Sen vitoria clara de monarquía ou república nun eventual referendo aínda que a maioría ve a Casa Real como anacrónica

Coroa e cetro expostos no Palacio Real de Madrid CC-BY-NC-SA Foto: © Patrimonio Nacional | Montaxe: Praza.gal

O debate segue aberto e axitado, sobre todo, polos escándalos ligados ao rei emérito que transcenden a través de pescudas xudiciais e -sobre todo- xornalísticas. Pero as respostas seguen ser claras en termos de maiorías cidadás tanto sobre a necesidade de someter a referendo o modelo de Estado entre monarquía e república como a respecto do sentido do voto se esa consulta chegase a celebrase.

No conxunto do Estado, algo máis do 43% da poboación sería partidaria dun referendo sobre monarquía ou república, segundo a enquisa do Instituto 40dB. para a Plataforma de Medios Independentes

Atendendo aos resultados da segunda edición da enquisa elaborada polo Instituto 40dB. para a Plataforma de Medios Independentes, impulsada por 16 medios de comunicación -entre eles, Praza.gal-, un ano despois do primeiro inquérito as posicións sobre a necesidade dun referendo entre monarquía e república seguen tendendo ao equilibrio, cunha lixeira primacía para quen apoian a consulta. No conxunto do Estado, sería favorable a que se celebrase algo máis do 43% da poboación e o "non" queda un chisco por riba do 36%, mentres que unha quinta parte se sitúa na indecisión.

No caso de Galicia, a poboación a prol de que esa votación se celebrase superaría o 50%, segundo o estudo, e a indecisión apenas quedaría no 10%. Así e todo, os datos galegos deste inquérito deben ser interpretados con cautela polo reducido tamaño da mostra, equivalente á porcentaxe de poboación sobre o total estatal -arredor do 6%- de mil entrevistas.

E, se esa votación chegase a celebrarse? É neste punto onde o equilibrio é máis claro aínda que con vantaxe republicana no total estatal e cun empate técnico en Galicia. Case o 40% do electorado optaría pola república nese referendo de ámbito estatal e ambas opcións contarían con arredor do 30% dos sufraxios en Galicia. A indecisión ante a pregunta rolda o 13% no Estado e achégase ao 20% en Galicia.

Nun eventual referendo, a opción republicana estaría lixeiramente por diante no conxunto do Estado e en Galicia ambos modelos roldarían o empate técnico

Como xa reflectían os resultados de 2020, a enquisa reflicte claras diferenzas nas preferencias entre monarquía ou república en función da idade do electorado. Entre a poboación máis moza (de 18 a 24 anos), o modelo republicano achégase ao 60% e a monarquía ten o seu maior apoio (case o 40%) entre maiores de 65 anos.

En función do recordo de voto ás principais opcións políticas estatais, case o 60% do electorado do PSOE e máis do 90% do de Unidas Podemos son partidarios dun referendo no que case a metade dos simpatizantes socialistas optarían pola república, que levaría case o 90% de apoios entre quen votaron por UP. Entre o electorado do PP e de Vox, a monarquía sería a preferida por máis do 60%.

Felipe VI 'aproba', Juan Carlos I 'suspende'

A enquisa do Instituto 40dB. para a Plataforma de Medios Independentes volve interesarse tamén pola valoración cidadá tanto do actual monarca, Felipe VI, como do seu pai, Juan Carlos I. Outra volta, o xefe do Estado aproba entre algo máis da metade da cidadanía do Estado e o monarca emérito suspende con claridade. As valoracións máis ben positivas sobre o rei superan o 50% no total estatal e nos datos galegos roldan o 60%. En ambos casos, apenas unha de cada cinco persoas ten unha opinión positiva sobre Juan Carlos de Borbón.

A monarquía como modelo político e o impacto dos escándalos

Alén das persoas que porten a coroa en cada momento, semella claro que a maior parte da poboación, tanto no conxunto do Estado como en Galicia, considera a monarquía como "unha institución doutros tempos sen sentido nunha democracia", toda vez que se manifestan "máis ben de acordo" con esta afirmación ao ser preguntada ao respecto. Así e todo, máis de catro de cada dez persoas concordan tamén con que este modelo "proporciona orde e estabilidade política".

A que si concita amplas maiorías é a interpretación sobre o impacto que os escándalos da familia real teñen na imaxe internacional do Estado. Arredor do 70% da poboación, atendendo aos resultados da enquisa, concordan con que "os escándalos da familia real danan a imaxe internacional de España".

Ficha técnica
Ámbito España
Universo Poboación xeral de 16 anos ou máis
Tamaño da mostra 1.000 entrevistas. Ponderación por sexo, idade, comunidade autónoma, tamaño de hábitat, comunidade autónoma e recordo de voto
Procedemento Entrevista online
Erro mostral ±3,1 puntos porcentuais, considerando que p=q=50% e un nivel de confianza do 95% baixo o suposto de mostreo aleatorio simple
Datas de realización 22/09/2021 ao 04/10/2021

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.