Logo de que Rueda apelase ao voto do medo fronte a unha coalición como a de 2005, Luis Menor, sucesor dos Baltar, di que a alternativa a Rueda sería "un goberno totalmente independentista"

O xoves pola noite, en Lugo, no mitin co que lanzou a campaña electoral, Alfonso Rueda apelou ao voto do medo asegurando que "ao do bipartito é ao que pode volver Galicia se nós non temos a maioría absoluta". Unha proclama que chegou tres días despois de que a patronal galega dixese que non ten medo a un posible goberno de coalición BNG-PSdeG ou PSdeG-BNG. E este venres, en Ourense, foi o presidente da Deputación e líder do PP provincial, Luis Menor, sucesor dos Baltar, quen fronte a Rueda apelou a outro dos medos que adoitan axitar os populares fronte ao resto de partidos, o do terrorismo. 

Nun mitin en San Cibrao das Viñas, Menor fixo unha longa reflexión sobre o resto de candidatos e candidatas que confrontan con Rueda. Sen citalos expresamente, pero falando supostamente en primeiro lugar de Ana Pontón e do BNG e despois do PSOE, Menor falou dun "rostro moi amable, incluso un rostro case descoñecido pola súa transformación, pero que é un rostro que vai aparellado dun partido que ten moi claro cales son os seus amigos, e os seus amigos non son precisamente a xente que se levanta e que traballa todos os días e que produce, senón que os seus amigos vanse manifestar a Bilbao para pedir a liberdade daqueles que mataron a 62 galegos, esa é a realidade, é un Goberno totalmente independentista, e esa sería a nosa alternativa". 

Menor continuou pedindo "polo tanto, voto útil fronte a un partido independentista, fronte a un partido que se apoia en terroristas, ou que é amigo de terroristas, porque así o fai publicamente, fronte a un PSOE que xa sabemos o que fai todos os días, sáltase todas as liñas habidas e por haber". A esas críticas a BNG e PSdeG Menor engadiu tamén críticas a Democracia Ourensana, formación coa que o PP pactou ata agora gobernos bipartitos e á que acusou de esquecerse "de dous terzos da provincia" porque "só pide para a capital". 

Luis Menor, que foi alto cargo de Rueda na Xunta, chegou á presidencia da Deputación de Ourense e foi posto á fronte do PP provincial tras a saída hai uns meses dos dous cargos de Manuel Baltar. Este venres el mesmo asumiu a responsabilidade dos resultados que poidan rexistrarse en Ourense asegurando que "se gañamos, se sae Rueda, gañades todos" pero adiantando que se hai "un mal resultado" el mesmo será "o responsable".