O mitin organizado por por Vox no centro sociocultural do barrio compostelán de Santa Marta para este pasado luns, 21 de setembro non puido celebrarse. A convocatoria antifascista de "concentración democrática e pacífica" dunha vintena de grupos políticos e sociais (dende organización políticas xuvenís como Galiza Nova ou a Coordinadora da Mocidade Socialista (CMS) ata colectivos estudantís ou de apoio a persoas migrantes, entre outros) logrou o seu obxectivo e o presentado polo partido de extrema dereita como "gran acto público" de "inicio do curso político" acabou suspendido.
Unha vintena de grupos políticos e sociais logran xuntar un milleiro de persoas para impedir o mitin programado pola formación de extrema dereita nun centro sociocultural da capital galega
Un peche nas horas previas no interior do centro e, sobre todo, unha concorrida manifestación durante a tarde que chegou a xuntar en torno a un milleiro de persoas propiciou a cancelación. Os dirixentes ultradereitistas, encabezados por un eurodeputado canda outros responsables territoriais do partido, aseguraron estar dispostos a manter o mitin no exterior do centro, se ben acabaron limitándose a proclamar diversas consignas -contra as persoas migrantes en Ceuta, sobre a españolidade de Galicia ou, simplemente, "yo soy español"- entre apupos da concorrencia e con escolta de axentes antidisturbios da Policía Nacional.
Eses mesmos axentes acabaron realizando varias cargas na fin da protesta, cando se produciron tirapuxas verbais entre manifestantes e partidarios de Vox. Tras o éxito os grupos promotores celebraron que a "respostas antifascista" lograse que Vox "non pasase" por onde pretendía na capital galega. "Orgullo da resposta da mocidade galega", expresou o BNG; "dicía Vox que hoxe era o seu comezo de curso, nós dicimos que este é o curso do antifascismo, fóra fascistas das nosas rúas", apuntou a CMS a través das redes sociais.
Vox, pola súa banda, deu en responsabilizar da manifestación e da propia cancelación do seu mitin á alcaldesa de Santiago, Goretti Sanmartín (BNG) e á Policía Local compostelá. Tamén ao presidente do Goberno de España, Pedro Sánchez.
Defensa e temores do PPdeG
A manifestación e cancelación do evento da organización de extrema dereita tamén foi reprochada polo PPdeG. A través da súa conta en X a secretaria xeral da formación, Paula Prado, considerou que "o que aconteceu foi unha sabotaxe á liberdade de expresión". "Independentemente das ideas, dende o PPdeG defenderemos sempre a democracia. Mentres, o BNG segue amosando a súa cara máis radical, tamén a máis verdadeira", considerou a número dous de Alfonso Rueda.
Este pronunciamento da formación que sustenta o Goberno galego prodúcese nun contexto de ascenso demoscópico de Vox no conxunto do Estado que o PPdeG detecta tamén en Galicia. Con menor intensidade que noutros lugares, pola propia implantación dos populares e polo punto de partida actual do partido de extrema dereita, que o pasado ano quedou sen a única representación institucional que lograra ata agora en Galicia, unha concelleira en Avión que decidiu abandonar e pasar a edil non adscrita. Pero existente.
O PPdeG critica o acontecido unha como "sabotaxe á liberdade de expresión" que atribúe ao BNG mentres o ascenso demoscópico de Vox ocupa e preocupa á formación que sustenta o Goberno galego
Paradoxalmente, as tendencias de voto ás que Alberto Núñez Feijóo se encomenda para tentar chegar á Moncloa en 2027 -un ascenso de Vox que compense o seu propio estancamento e dea lugar a unha maioría absoluta das dereitas no Congreso que o invista presidente- levan insertas preocupacións para o PPdeG. Porque o que pode levar os populares ao Executivo central pode erosionalos en Galicia.
Isto sucede tanto por votos á extrema dereita que acaben ou non converténdose en escanos ao Congreso como por sufraxios nas municipais que lles compliquen ou impidan o acceso a alcaldías ou deputacións. Ou, sobre todo, por unha irrupción nas eleccións galegas que poida acabar facendo perigar a placidez da maioría absoluta.
Esas tendencias, admiten en privado dirixentes destacados, ocupan e preocupan no PPdeG mesmo máis que potenciais ascensos do BNG, actual primeira forza no espectro da esquerda, e xa condicionan decisións e posicións públicas do partido e da Xunta en ámbitos especialmente proclives ás guerras culturais da extrema dereita, tales como acollida e dereitos das persoas migrantes, o agro, a caza ou a identidade e a lingua galegas.
