Xulio Ferreiro presenta a súa lista para a Marea Atlántica con catro cambios nos primeiros postos

Ferreiro e integrantes dos primeiros postos da lista proposta para a Marea Atlántica nas municipais de 2019 CC-BY-SA Marea Atlántica

Hemeroteca

As formacións políticas comezan a presentar as súas apostas para as transcendentais eleccións municipais do 26 de maio. En Galicia un dos escenarios clave desta pugna será o que en 2015 acolleu unha das mudanzas políticas máis significativas, A Coruña. O actual alcalde, Xulio Ferreiro, fixo pública a últimas horas deste domingo a súa proposta de candidatura para as primarias da Marea Atlántica, que se celebran entre os días 15 e 17 deste mes de febreiro, cunha relación de nomes que presenta catro cambios a respecto da lista da formación en 2015, cando as primarias seleccionaban a cada membro da lista por separado e non á candidatura completa.

Ao peche do prazo para a presentación de candidaturas a única rexistrada foi a encabezada por Ferreiro, coa edil de Medio Ambiente, María García, no seu número dous, o responsable de Rexeneración Urbana, Xiao Varela, no número tres, e a concelleira de Xustiza Social, Silvia Cameán, no cuarto posto. O número 5 é para o actual edil de Economía Social e Emprego, Alberto Lema, e o sexto para a titular de Participación, Claudia Delso. 

Iago Martínez, Isabel Faraldo, Susana Soneira e Javier Pérez incorpóranse nos dez primeiros postos da lista en substitución dos actuais edís Rocío Fraga José Manuel Sande, Eugenia Vieito e Daniel Díaz Grandío

A primeira incorporación na lista de Ferreiro a respecto de 2015 chega no sétimo posto, no que figura Iago Martínez, actual xefe de gabinete da Alcaldía e membro da coordinadora da Marea Atlántica. No oitavo incorpórase Isabel Faraldo, traballadora do Sergas e membro de Podemos, partido do que foi secretaria local e que hai catro anos non contaba con militantes na lista da Marea Atlántica ata o posto 13. O primeiro treito da lista complétano no número 9 Susana Soneira, actual decana do Colexio de Graduados Sociais da Coruña e Ourense, e no décimo Javier Pérez, profesor de FP no CIFP Ánxel Casal do barrio de Monte Alto.

A proposta formulada por Ferreiro confirma que non recuncarán na corporación municipal da Coruña os catro actuais membros do goberno local que xa o anunciaran: Rocío Fraga -número dous en 2015-, José Manuel Sande -quinto hai catro anos-, Eugenia Vieito -fora a sexta- e Daniel Díaz Grandío, que concorreu no noveno posto nas anteriores municipais.

O alcalde da Coruña, dirixíndose a membros da súa candidatura e outros integrantes da Marea Atlántica CC-BY-SA Marea Atlántica

"Revalida a unidade"

Tras os encontros con integrantes da Marea Atlántica o alcalde da Coruña coida que a súa proposta de candidatura é o resultado de "escoitar todas as voces" e "revalida a unidade ampla das forzas do cambio". "Así -mantén- vai ser o próximo goberno municipal da Coruña", froito dunha "candidatura de entendemento en tempos de confrontación". No que atinxe ás ausencias de Fraga, Sande, Vieito e Díaz Grandío, Ferreiro asegura que "as compañeiras que marchan xa son parte da transformación que iniciamos" e "se non é no pazo, seguiremos con elas na praza, coma sempre".

Segundo o calendario aprobado pola formación, que actualmente conta con 10 edís na corporación coruñesa, a candidatura de Ferreiro será definitiva o día 7 e as votacións celebraranse dos días 15 ao 17. Os resultados definitivos chegarían o día 21 e o 28 a Marea Atlántica escollerá os últimos postos da súa proposta para as municipais. Están, anuncian, "reservados a persoas notables".

Despece

  • Jorquera defende o "proxecto transformador" do BNG fronte á "desmobilización"

    Jorquera e o resto de integrantes do primeiro treito da lista do BNG na Coruña CC-BY-NC-SA BNG

    O BNG da Coruña está a avanzar as persoas que acompañarán a Francisco Jorquera e Avia Veira na súa candidatura para as municipais. Tras revelar o nome da profesora e escritora Mercedes Queixas para a terceira posición, a pasada fin de semana o Bloque presentou nun acto público na praza de María Pita os seguintes once nomes, chegando así ata o número de edís que no caso coruñés son sinónimo de maioría absoluta, catorce.

    Segundo o que fora voceiro do Bloque no Parlamento e no Congreso, a aposta da formación soberanista na Coruña é dupla. Por unha banda, "devolver a ilusión á cidade cun cambio feito dende nós, enraizando coa mellor tradición galeguista e progresista" da cidade. Por outra, evitar a "desmobilización" da esquerda, que beneficiaría a "triple alianza" da dereita que "quere que retornemos a un pasado negro".

    Tras Francisco Jorquera e Avia Veira sitúase, como número tres, a profesora e escritora Mercedes Queixas

    Por tras de Jorquera, Avia e Queixas o número tres da candidatura do BNG é para Patricia Cordo, traballadora da empresa de telemárketing Extel e activa participante, dende o comité de empresa, das mobilizacións contra a precariedade laboral nese sector. No quinto posto sitúase o profesor de Dereito Procesual David Soto e no sexto, a actriz Isabel Risco.

    O fisioterapeuta Alberte Nicolás, responsable comarcal de Galiza Nova, a enfermeira María Seijo ou o mariñeiro Xosé Iglesias son tamén integrantes dunha lista na que figuran Ricardo Vales (10), voceiro da Comisión Aberta de Defensa do Común, a filóloga e docente Celia Armas (11), a funcionaria da UDC Marisol Miras (12), a traballadora do sector do márketing e activista feminista Yolanda Naya (13) e o traballador de Alcoa Xulio Moskowich (14).

    Segundo Jorquera, o BNG pretende que o vindeiro 26 de maio se poida trocar "a frustración e a  decepción provocada por catro anos de actuación do goberno municipal" por "un proxecto transformador que devolva á Coruña o impulso que necesita. "A nosa intención -mantén- é sermos a forza que lidere a política municipal".

  • O PP coruñés non pecha a porta a pactar coa extrema dereita porque "non fai cordóns sanitarios"

    Calvo, na presentación das candidaturas do PPdeG para as municipais de 2019 CC-BY-SA PPdeG

    Un dos interrogantes que pairou sobre a campaña municipal de 2015 en Galicia foi o eventual impacto da emerxencia de Ciudadanos nas corporacións municipais e a posibilidade de que os de Albert Rivera axudasen ao PPdeG a conservar gobernos malia á súa caída en votos e edís. No caso das cidades C's logrou representación en Ferrol, Lugo e Pontevedra, pero en ningunha delas logrou sumar maioría absoluta co PP.

    Catro anos despois ao factor Ciudadanos engádese outro no debate público, especialmente dende as eleccións andaluzas do pasado decembro: a posibilidade de que o partido de extrema dereita Vox consiga representación nos concellos e axude a apuntalar maiorías de dereitas. A falta de datos demoscópicos públicos -a principal empresa do sector en Galicia está a realizar enquisas nas últimas semanas- foron xa varios os cargos do PPdeG que admitiron ás claras a súa intención de pactar con Vox se fose preciso para gobernar.

    Diego Calvo defende eventuais alianzas co partido de extrema dereita Vox porque "se hai que pactar con alguén e se pon enriba da mesa unha serie de puntos e podemos converxer, o facemos"

    Despois dos aspirantes ás alcaldías de Lugo e Vigo polo PP, Ramón Carballo e Elena Muñoz, quen vén de abrir a porta a Vox é o presidente provincial do partido na Coruña, Diego Calvo. O tamén vicepresidente do Parlamento e membro da dirección que preside Pablo Casado defende que "o PP non fai cordóns sanitarios a ninguén" e, daquela, "se hai que pactar con alguén e se pon enriba da mesa unha serie de puntos e podemos converxer, o facemos", respondeu ao ser preguntado ao respecto durante unha entrevista na Cadena SER.

    Para xustificar estes eventuais acordos Calvo alude ao Concello de Fene, onde o PP desaloxou o BNG da alcaldía a través dunha controvertida moción de censura con Somos Fene, grupo que estivo ligado ás mareas municipais do que, precisamente, En Marea se desligou tras estes movementos xunto ao PP.  Aínda que os propios integrantes de Somos Fene aseguraron "non ter nada que ver con En Marea", Calvo afirma que nese "concello da ría de Ferrol nós estamos pactando e estamos no goberno cun partido que é Somos Fene, que viña das mareas". Esa é a mostra, di o popular, de que "o PP non fai cordóns sanitarios, falamos do concello con calquera partido".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza