A Xunta amplía o límite de ocupación de locais e eventos pola COVID cadrando coa fin da obriga xeral da máscara ao aire libre

Dúas persoas camiñando con máscara ao aire libre nos terreos portuarios da Coruña, a finais do pasado marzo © Concello da Coruña

Hemeroteca

O vindeiro sábado, 26 de xuño, decaerá en todo o Estado a obriga xeral de uso de máscara ao aire libre. Así o anunciou o presidente do Goberno de España, Pedro Sánchez, que remitiu á aprobación da norma concreta en Consello de Ministros extraordinario o xoves desta semana, 24 de xuño, para coñecer os detalles.

Escasas horas despois do anuncio de Sánchez, o presidente da Xunta criticouno por "político". Así o fixo tamén este mércores, cando Alberto Núñez Feijóo ratificou, alén deses reproches, que o Goberno galego concorda con esa retirada. Ante o previsible fin da obriga xeral, avanza, o criterio da Xunta será aplicala ao aire libre agás "cando non sexa posible gardar a distancia dun metro e medio". No caso de que un concello regresase ao nivel máximo de restricións -actualmente, ningún o está- tamén volvería a obriga xeral de portar máscara en exteriores.

Á espera da aprobación no Consello de Ministros deste xoves, a Xunta é partidaria da retirada da máscara ao aire libre agás "cando non sexa posible gardar a distancia dun metro e medio"

Deste xeito, e á espera de coñecer a redacción concreta da norma estatal e a súa translación ao ordenamento galego, dende o sábado 26 a "obrigatoriedade de máscara no exterior" quedará "eliminada" sempre que sexa posible gardar distancia de seguridade con persoas non conviventes (coas conviventes, non será preciso, explicita Feijóo). Si continuará sendo esixida nas terrazas hostaleiras agás no momento do consumo -sexan ou non conviventes as persoas que consomen- e tamén en eventos exteriores como eventos deportivos ou concertos, onde haberá que atender aos "matices" de cada protocolo concreto. 

Escasas horas despois a ministra de Sanidade, Carolina Darias, ratificou as liñas xerais do novo modelo. A máscara, ratificou, deixará de ser obrigatoria ao aire libre cando haxa distancia de seguridade mínima dun metro e medio. En interiores, incluíndo o transporte público, seguirá sendo preciso levala posta.

Feijóo, coa conselleira de Política Social e o conselleiro de Sanidade, tratando o novo modelo de restricións no serán do martes, 22 de xuño de 2021 CC-BY-SA Ana Varela / Xunta

Incremento xeral das ocupacións máximas de locais e eventos

A retirada da obriga xeral para o uso de máscara cadrará en Galicia coa entrada en vigor da xa anunciada revisión xeral dos límites de ocupación máxima en locais e eventos. Sempre á espera da súa plasmación no Diario Oficial de Galicia (DOG), Feijóo avanza unha ampliación do 50% ao 75% da capacidade máxima permitida en lugares de culto, academias, congresos, ximnasios, museos, arquivos, bibliotecas ou acuarios. Todo isto, sempre e cando o concello non se atope en nivel máximo de restricións (ningún, actualmente).

Ademais, as terrazas hostaleiras poderán ofrecer o 100% da súa capacidade e non o 75%, como sucedía ata agora. Nestes negocios, ademais, as barras e mostradores poderán volver ser utilizados parcialmente: aínda non se poderá consumir nelas, pero si poderán ser utilizadas para "pedir e servir". No interior, o límite continuará no 50%.

Atendendo ao exposto por Feijóo e ao indicado posteriormente pola Xunta, estas novas normas de ocupación máxima para a hostalería aplicaríanse nos concellos en nivel baixo de restricións (a práctica totalidade, actualmente), mentres que no resto haberá matices máis estritos. A Consellería de Sanidade remite á publicación da norma completa, este venres no DOG, para coñecer todos os detalles.

Persoas con máscara nun mercado ao aire libre en Carballo, o pasado marzo © Concello de Carballo

A referencia para a ocupación máxima de locais e eventos pasa do 50% ao 75% e os locais hostaleiros poderán volver ofrecer o 100% das súas prazas en terrazas

A ampliación dunha sexta a unha terceira parte das prazas en pé no transporte urbano, a reapertura das áreas de lecer dos centros comerciais ou a autorización para o "contacto físico nos establecementos de actividades deportivas e academias de danza" serán outros dos pasos dunha nova fase da desescalada que, aclara o presidente da Xunta, tamén traerá consigo os agardados protocolos para celebracións como vodas ou comuñóns, con diferenzas en función de se o evento se celebra ao aire libre ou baixo teito. O seguinte paso, o 1 de xullo, será a reapertura de pubs e discotecas con protocolos que o Goberno galego aínda está finalizando.

Vacinación da poboación de 30 a 39 anos

Alén da flexibilización das restricións e das críticas ao Goberno de España -Feijóo deu en censurar que a decisión da retirada das máscaras sexa aprobada por "vinte e dous ministros", obviando que é preciso que o fagan porque implica modificar unha lei-, o presidente da Xunta ratificou tamén este mércores que o Goberno galego mantén sen cambios a previsión de que "na primeira semana de xullo" poida comezar a vacinación contra a COVID-19 do grupo de poboación de entre 30 e 39 anos. Para daquela, indica, estará en marcha o sistema de autocita de forma paralela á cita ordinaria.

Despece

  • O 55% da poboación galega maior de 40 anos ten xa a vacinación completa contra a COVID

    Preparación de doses de vacinas contra a COVID para a súa administración, en Expocoruña o pasado mario CC-BY-SA Sergas

    Dende o comezo da pandemia faleceron en Galicia 4 persoas que contraeran a COVID-19 e tiñan menos de 40 anos e outras 7, de 40 a 49. As restantes, ata chegar a 2.434, estaban por riba desa franxa de idade. Esta foi a razón pola que a vacinación se iniciou nas residencias da terceira idade e, alén dos grupos de poboación máis expostos, continuou por orde de idade decrecente.

    O Sergas administra case 30.000 doses máis de vacinas e máis dun millón e medio de persoas recibiron xa cando menos unha

    Esa é a razón, tamén, pola que o Ministerio de Sanidade vén poñendo nas últimas xornadas o foco na inmunización da poboación maior de 40 anos. Na xornada en que o conxunto do Estado acadou os 15 millóns de persoas coa pauta de vacinación completa, en Galicia este grupo de poboación xa estaba maioritariamente inmunizado. Concretamente, o 55,2%, uns 8 puntos por riba da media estatal.

    Estes datos rexístranse tras unha xornada, a do martes, na que o Sergas administrou case 30.000 doses máis e na que o avance se percibe, sobre todo, nas primeiras doses do grupo de 40 a 49 anos e tamén nas segundas doses a persoas de 60 a 69 anos que, ao recibiren a vacina de AstraZeneca (con máis marxe entre as dúas administracións), tiveran que agardar máis. Sanidade asegura que está a acelerar a protección deste grupo de idade dentro dos intervalos que marcan os protocolos e a porcentaxe con pauta completa supera xa o 45%, aínda por tras do grupo de 50-59, cuxa inmunización comezou máis tarde.

    Dende o comezo da campaña de vacinación, o Sergas leva administradas case 2,5 millóns de doses. Eran o 95,4% das recibidas ata o pasado martes, uns catro puntos por riba da media estatal. Unha vez superado o fito do millón de persoas con pauta completa, a cifra achégase xa aos 1,06 millóns de persoas, algo máis do 43% da poboación diana, que agora está composta por todas as persoas de 12 ou máis anos. As persoas que xa recibiron cando menos unha dose son 1,54 millóns, case o 63% da poboación diana.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza