A Xunta prolonga as restricións na Coruña pola COVID-19 e restrinxe visitas a hospitais, pero mantén a mobilidade

Os tres niveis de restricións afectan á Coruña, á súa comarca e ao conxunto da área sanitaria CC-BY-NC-SA Praza Pública

Hemeroteca

As restricións impostas a pasada semana pola Xunta para tentar conter o incremento de contaxios da COVID-19 na comarca da Coruña non deron, polo momento, os resultados agardados. Así o acreditan as cifras deste 12 de agosto e así o admitiu o Goberno galego por boca do presidente en funcións, Alberto Núñez Feijóo, que tras a reunión do comité clínico da Consellería de Sanidade encargado da crise do coronavirus ratificou a extensión das limitacións polo menos durante unha semana máis, coa restrición de visitas a hospitais como principal novidade. Cando menos de momento, a Xunta non botará man das prohibicións de mobilidade, como si fixera o pasado xullo polo brote da Mariña. [Galicia volve superar os cen casos novos de coronavirus nun día, máis da metade na área da Coruña]

A edición extraordinaria do DOG concretará a posible extensión do peche de pubs e discotecas a outros concellos da contorna da Coruña, onde as restricións non implicaron un descenso dos contaxios tras cinco días en vigor

Con 61 dos 110 novos positivos da última xornada e 28 das 38 persoas ingresadas en hospitais de toda Galicia, durante polo menos sete días máis seguirán pechados pubs e discotecas e prohibidas as festas e verbenas nos 9 concellos da comarca da Coruña. Seguirán, do mesmo xeito, limitados horarios e capacidades de locais comerciais e hostaleiros ao 50% e restrinxidas a 10 persoas as reunións privadas de persoas que non convivan entre si. A posible extensión dalgunha destas medidas a outros municipios concretarase nunha edición extraordinaria do Diario Oficial de Galicia, este mesmo mércores.

"Pode haber confinamentos en Galicia nas próximas semanas ou meses" en caso de que se "incumpran" as limitacións como, segundo Feijóo, sucede "en moitos casos" na Coruña nos últimos días

Esa publicación no DOG concretará, ademais, o alcance da restrición ao acceso de visitantes e acompañantes nos centros hospitalarios da comarca. Incluirá, adicionalmente, a extensión do peche dos centros de día para maiores e persoas con discapacidade e mais a prolongación da prohibición de visitas en residencias de maiores en toda a área sanitaria da Coruña-Cee.

Segundo Feijóo, que o "control xeral de mobilidade" non fose aprobado este mércores non quere dicir que "non haxa que abordalo nos próximos días". "Pode haber territorios con mobilidade reducida (...), pode haber confinamentos en Galicia nas próximas semanas ou meses" en caso de que se "incumpran" as limitacións vixentes como, afirmou, está sucedendo "en moitos casos" na Coruña nos últimos días.

Segundo o avanzado por Feijóo, estas restricións irán acompañadas polo que define como un incremento "notabilísimo" de realización de probas PCR na contorna coruñesa, mesmo cun "cribado aleatorio en sectores máis afectados". O Sergas, indica, prevé realizar "ata 1.200 PCR diarias" na Coruña e concellos da zona, o que suporía un forte incremento, toda vez que nas últimas semanas as realizadas en toda Galicia non adoitan chegar ás 2.000 ao día.

Prohibición de fumar 

Alén das medidas especificamente dirixidas a procurar conter a expansión do coronavirus na área da Coruña, o presidente da Xunta en funcións avanzou tamén a implantación, dende este 13 de agosto, dunha nova medida en toda Galicia. "O fume é un factor de transmisión" e por iso, di, o comité clínico considera "lóxico" que "non se poida fumar" pola rúa ou noutros espazos abertos cando non exista distancia de seguridade entre as persoas, toda vez que ademais esta actividade implica a retirada da máscara. Ese veto ficará concretado tamén na devandita edición extraordinaria do DOG.

Despece

  • A Xunta volve evidenciar que non fai públicos todos os datos do coronavirus que manexa

    Feijóo e o conselleiro Almuíña, participando na reunión do comité clínico da COVID-19 dende San Caetano, este 12 de agosto CC-BY-SA Ana Varela

    O pasado maio a Xunta fixo públicos varios informes dos expertos que asesoran o Goberno galego na toma de decisións a respecto da pandemia do coronavirus. Aqueles documentos, presentados polo Executivo para sinalar a conveniencia de celebrar as eleccións no verán e non no outono, evidenciaron que a Xunta manexa datos moito máis precisos sobre a evolución da COVID-19 que os que publica nos seus comunicados diarios.

    Este 12 de agosto o actual presidente da Xunta en funcións volveu amosar ás claras que o seu gabinete non fai públicos todos os datos sobre o coronavirus dos que dispón. No marco da rolda de prensa sobre o mantemento de restricións na comarca da Coruña e a posible adopción doutras para tentar frear os contaxios, Alberto Núñez Feijóo sinalou, por exemplo, que a incidencia acumulada na contorna coruñesa é agora de 92 novos positivos por cada 100.000 habitantes fronte ao 23,74 da media galega ou e explicou tamén que o "incremento brusco de contaxios" se producira entre os días 6 e 8 de agosto.

    Feijóo mencionou na súa comparecencia datos sobre a incidencia da COVID-19 na Coruña ou sobre o perfil das persoas infectadas que o Sergas segue sen publicar

    Ao tempo, o titular da Xunta ofreceu algúns datos sobre o perfil das persoas que contraen a doenza -neste caso, na Coruña- que o Ministerio de Sanidade si publica para todo o Estado con datos fornecidos polas comunidades autónomas, pero que o Sergas non divulga. Así, segundo Feijóo, "dos novos contaxios, o 80% son persoas de menos de 60 anos" e "a incidencia máis elevada" na zona rexístrase entre a poboación de entre 20 e 40 anos". Nesta liña, agregou que nos hospitais da área sanitaria, a media de idade das persoas ingresadas con test positivo do coronavirus "é de 56 anos" e hai "varios ingresos" de persoas menores de 30 anos.

    Isto sucede nun contexto no que a Xunta segue a destacar entre o conxunto das comunidades autónomas pola súa opacidade na difusión dos datos sobre o coronavirus. Así, por exemplo, o Goberno galego continúa sen divulgar unha serie histórica  completa e aberta sobre o impacto da pandemia en Galicia malia dispoñer dela -a maioría de comunidades autónomas e o propio Ministerio si publican as súas-, sen informar directamente do número de novos casos detectados cada día ou sen ofrecer detalles do impacto do virus a nivel municipal ou comarcal.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza