querENDO reuniuse coa Consellaría de Sanidade para demandar a realización dun cribado que faga aflorar "os miles de casos de mulleres sen diagnóstico" que padecen endometriose. Porén, a proposta foi rexeitada

O pasado martes 30, un grupo de socias de querENDO, entidade de mulleres con endometriose, reuniuse con representantes da Consellería de Sanidade na sede do departamento en San Lázaro. A xuntanza fora solicitada pola asociación para demandar á Xunta a realización dun cribado que faga aflorar "os miles de casos de mulleres sen diagnóstico" que padecen esta doenza de orixe xinecolóxica. Calcúlase que a doenza afecta a un 10% da poboación feminina en idade fértil e que o atraso diagnóstico ronda os 8 anos de media. 

A entidade sinala que na reunión os representantes da Consellería descartaron a posibilidade de facer o cribado demandado para a endometriose "por carecer esta doenza de probas específicas que puideran facer unha abordaxe simple nese cribado".

A entidade defende que "de realizarse este cribado moitas mulleres non chegarían aos graos máis desenvolvidos da doenza onde moitas veces a dor se volve incapacitante para o desenvolvemento dunha vida normalizada"

O motivo que orixina a demanda é o feito de que esta doenza ten un atraso diagnóstico que se prolonga por anos, nos que as mulleres asisten a numerosas consultas con facultativos de distintas especialidades relatando os seus síntomas e sen que ninguén lle dea nome á doenza por diversas causas. Neses anos a súa calidade de vida empeora, o prognóstico na evolución da doenza tamén, e acumulan dores e molestias que van facendo cada vez máis difícil levar unha vida normal.  A maiores tamén hai que ter en conta que canto máis tardío é o diagnóstico máis dificultades teñen as mulleres con endometriose para conseguir un embarazo no caso de desexalo. 

A entidade defende que "de realizarse este cribado moitas mulleres non chegarían aos graos máis desenvolvidos da doenza onde moitas veces a dor se volve incapacitante para o desenvolvemento dunha vida normalizada".

QuerENDO destaca que "aínda que o tema fundamental da reunión non obtivo a acollida esperada", a xuntanza serviu para facer un repaso das demandas que este colectivo de afectadas mantén desde a súa creación hai xa máis de dez anos

QuerENDO destaca que "aínda que o tema fundamental da reunión non obtivo a acollida esperada", a xuntanza serviu para facer un repaso das demandas que este colectivo de afectadas mantén desde a súa creación hai xa máis de dez anos. 

Entre elas, destaca a proposta de creación dunha Unidade Multidisciplinar de Endometriose que sirva en Galicia para dar resposta aos casos máis difíciles. Tamén se pide a estabilización do persoal nas consultas específicas xa creadas e a ampliación de horarios naquelas consultas específicas que están máis saturadas.

A entidade demanda a creación dunha Unidade Multidisciplinar de Endometriose que sirva en Galicia para dar resposta aos casos máis difíciles, así coma a mellora na formación dos profesionais e na dotación das áreas de fisioterapia

Así mesmo, a entidade propón a creación de vídeos divulgativos sobre a doenza para as pantallas das salas de espera de xinecoloxía e dos centros de primaria. Igualmente, reclama o afondamento na formación dos profesionais nesta doenza e aplicación de medidas correctoras no nesgo de xénero á hora de diagnosticar e tratar a doenza. Finalmente, demanda melloras na dotación das áreas de fisioterapia con novas técnicas que aínda non se estenderon ao tratamento da endometriose.

As mulleres con endometriose son en Galicia arredor dunhas 60 mil, destaca a asociación, que di esperar que "algún dos temas expostos" na xuntanza sexa estudado nun futuro por parte da Consellaría de Sanidade.