Comeza a campaña, a Xunta insiste en vender obras e axudas directas

O Goberno galego desenvolveu na primeira xornada da campaña electoral unha intensa axenda de promoción dos seus logros políticos, actuacións prohibidas pola lexislación electoral. Seguir lendo

O debate entre Pedro Sánchez e Feijóo terá lugar o 19 de novembro e será organizado pola Academia de Televisión

Será moderado por María Casado, presidenta da entidade, en cuxa sede se levou a cabo unha reunión para perfilar os detalles dun cara a cara para o que se acordaron os seguintes bloques temáticos e nesta orde: vivenda, economía e fiscalidade, política social e servizos públicos, loita contra a corrupción e rexeneración democrática, migración e política exterior. 

Ademais, TVE organizará o 23 de novembro un debate parlamentario con PP, PSOE, Vox, Fronte Ampla, ERC, Bildu, PNV e Junts.

Feijóo denuncia a "fraude laboral" que supón o "absentismo" e pide á xente "que vaia traballar todos os días á semana e non se ausente os luns e os venres"

Ademais, o candidato popular asegura que hai medio millón de persoas cobrando o Ingreso Mínimo Vital (IMV) "sen ter traballado unha hora no último ano". Segundo os datos do Ministerio de Seguridade Social, máis do 80% dos perceptores son españois e dous de cada tres traballaron no último ano. Arredor de 155.000 persoas estranxeiras perciben ese ingreso. 

O líder do PP fixo estas declaracións na entrevista co youtuber Jordi Wild, na que asegurou que non cederá a Vox "ministerios de Estado" no caso de formar un goberno de coalición

Os plans de Vox se goberna con Feijóo: recentralización, antifeminismo, negacionismo climático e deportacións

O programa da ultradereita, cunha axenda económica ultraliberal, propón cotas para alumnado "doutras culturas" nas clases, derrogar as leis contra a violencia machista, contra o cambio climático ou a de Memoria Democrática, acabar coa sanidade universal, instaurar unha selectividade única en toda España ou restrinxir máis o galego. Seguir lendo

Á caza dos votos da caza: novo conselleiro, mesmas prioridades en Medio Ambiente

Unha das primeiras reunións do novo conselleiro, Nicolás Vázquez, é coa Federación Galega de Caza, encontro que nos últimos anos se vén repetindo a poucos días de eleccións xerais ou galegas. Seguir lendo

Fronte Ampla formula unha disxuntiva: "Ou nós ou Vox"

Pola Fronte Ampla o seu portavoz en Galicia, Paulo Carlos López, participou nunha pegada de carteis en Vigo desde a que chamou a concentrar o voto na súa formación. "Ou nós ou Vox", salientou o candidato ao Congreso, que asegurou que "se saímos todas as persoas a votar que saíron onte", en referencia ás manifestacións pola vivenda, "haberá un goberno de progreso".

Pontón chama por "apoio masivo" ao BNG: "A rebeldía que vimos na folga ten que chegar ás urnas"

No BNG a súa portavoz nacional, Ana Pontón, participou en Vigo nun mitin de apertura da campaña no que salientou que "a rebeldía que vimos na folga non pode quedar nas rúas, ten que chegar ás urnas o 29N cun apoio masivo ao BNG". Pola súa banda, o deputado e cabeza de lista pola Coruña Néstor Rego celebrou un acto en Santiago con outros candidatos e candidatas.

Besteiro pide concentrar o voto progresista no PSOE fronte "á motoserra de Feijóo e Abascal"

No PSdeG a campaña comezouna o seu secretario xeral, José Ramón Gómez Besteiro, cun primeiro acto a última hora da tarde en Vigo e posteriormente outro a media noite en Ourense salientando que "o único que separa avanzar de retroceder é o voto". O líder dos socialistas galegos pediu concentrar o voto progresista no PSOE fronte á "motoserra de Feijóo e Abascal" e avanzou unha campaña "centrada en vivenda, salarios e pensións". Asegura que "non estamos ante unha campaña calquera porque non abonda que medre a economía, o progreso ten que chegar á vida da xente".

Rueda secunda a chamada á "reconstrución nacional" de Feijóo

No PP a campaña en Galicia lanzárona a medianoite o presidente do PPdeG, Alfonso Rueda, e o secretario xeral de Feijóo, Miguel Tellado, cabeza de lista ao Congreso pola Coruña. Nun acto nun hotel de Santiago Rueda pediu "encher as urnas de futuro" para facilitar a "reconstrución nacional" que quere acometer Feijóo. O líder popular pediu ao seus "non confiarse" xa que as eleccións "só se gañan nas urnas" e Tellado, pola súa banda, continuou co seu ton habitual, neste mitin para mofarse das estimacións do CIS asegurando que "vemos a Tezanos dicir que Sánchez está a dous accidentes de tren dunha maioría absoluta. Hai que ter pouca vergoña e hai que rir da xente", agregou.

[O CIS apunta a unha posible maioría da esquerda no Estado e á irrupción de Vox en Galicia]

Agora si, en campaña. Dende as 00:00 deste 13 de novembro as forzas políticas xa poden pedir legalmente o voto para as eleccións xerais. A carreira cara ás urnas preséntase como crucial antes duns comicios que é posible adxectivar como transcendentais. En xogo, a continuidade do bloque histórico de forzas de esquerda e soberanistas que logrou investir a Pedro Sánchez en 2023 ou o acceso ao Goberno de España do PP do ex-presidente Alberto Núñez Feijóo en bipartito coa extrema dereita de Vox.

[EDITORIAL: 29 de novembro: moito máis que unhas eleccións xerais]