O Festival dos Eidos celébrase a derradeira fin de semana de agosto en Parada do Courel
A Casa da Fonte, onde naceu o poeta Uxío Novoneyra, na aldea de Parada do Courel, está sempre aberta ás visitas. A fundación que leva o nome do ilustre poeta mantén o espírito de 'centro de reunión' e dende hai once anos congrega a destacadas poetas para celebrar o Festival dos Eidos, entre outras moitas actividades durante o ano.
Este agosto, entre o sábado 29 e o domingo 30, poetas de varias xeracións volverán citarse arredor do universo de Novoneyra para o gozo da veciñanza e das persoas visitantes. O certame, que conta co apoio da Vicepresidencia da Deputación de Lugo, inclúe recitais de poesía, conversas, música ou unha ruta guiada pola memoria democrática de Parada do Courel.
A lectura comentada do poemario 'Os Eidos' estará a cargo de Carmen Blanco e Claudio Rodríguez Fer
As actividades do sábado comezan cedo (en dous pases, ás 9.30 e ás 10.30 horas) coa ruta de observación das aves que aparecen nos poemas d’Os Eidos. Libro do Courel de Uxío Novoneyra. O biólogo Xabier Vázquez Pumariño, que traballa de consultor ambiental, será o encargado de guiar o camiño. Pumariño é propietario da marca Birding Galicia de consultoría en bioturismo.
Carmen Blanco e Claudio Rodríguez Fer vanse encargar da lectura comentada do poemario Os Eidos ás doce do mediodía dende o curral da casa. O seu enfoque resulta de especial interese por seren os dous encargados da última edición do libro que o poeta publicou en vida.
Olga Novo e Su Garrido Pombo ofrecerán un recital conxunto de poesía e música
A poeta Olga Novo –galardoada co Premio Nacional de Poesía que concede o Ministerio de Cultura por Feliz idade–, tamén profundamente vinculada á obra de Uxío Novoneyra, e Su Garrido Pombo ofrecerán un recital conxunto de poesía e música ás 13 horas na horta.
O souto comunal da aldea de Parada, o souto da Rubial, xuntará as voces de Antón Lopo e Alberto Lema, que se reunirán ás cinco da tarde para conversar sobre a recente publicación de Río Grande na editorial Chan da Pólvora. A partir das 18.30 horas, o recital central do festival acollerá as voces de Olalla Cociña, Xerardo Quintiá, Julieta Valero e Karlotti, de novo no curral da casa, sede da Fundación Uxío Novoneyra.
O domingo está reservado para a ruta pola memoria democrática de Parada do Courel a partir a obra de Novoneyra
A psicodelia da banda Moura pechará o día na horta, co monte da Lomba e co monte da Pinza de fondo, seguida de dúas sesións dos picadiscos Jas Processor e DJ Tristón. Todas as actividades do Festival dos Eidos son de balde ata completar o aforo.
O domingo 30 de agosto está reservado para a ruta pola memoria democrática de Parada do Courel a partir a obra de Novoneyra, que sendo un cativo de cinco anos gardou o segredo de ter agochado na súa casa o seu tío, alcalde pola Fronte Popular, e presenciou o pranto polo fusilamento de Manuel de Ribadaira, recollido no romance en memoria de todos os represaliados polo franquismo en Do Courel a Compostela. Ignacio Vilariño será o encargado de guiar este percorrido para non esquecer o noso pasado, ás 11 e ás 12.30 horas.
