Praza Pública

Unha ducia de lugares nos que pasar unha vaga de calor

Unha vaga de calor como a desta semana invita a buscar solucións para pasala o mellor posible. Aquí vai unha ducia de propostas.

  1. 01

    Na praia

    Galicia ten oficialmente 863 praias con todo tipo de características, desde urbanas ata salvaxes, de moi difícil acceso ou nudistas, e sen contar as fluviais. Así que malo será que non se poida atopar un areal no que haxa unha sombra e corra algo de vento. [Imaxe: CC-BY-SA Praza Pública]

  2. 02

    Na auga das Cíes

    Sexa cal sexa a praia na que decidas refuxiarte do calor, aínda que non teña sombra sempre che quedará a auga do mar. Pero se o que buscas é baixar realmente a temperatura, non hai como a auga das illas Cíes. [Imaxe: CC-BY-SA Xunta de Galicia]

  3. 03

    Na Festa da Auga de Vilagarcía

    Se o que se quere para o calor é auga pero non tan fría como a das Cíes, unha boa opción pode ser a Festa da Auga de Vilagarcía, que se celebra o vindeiro mércores 16 no marco das festas de San Roque. [Imaxe: CC-BY-SA Xunta de Galicia]

  4. 04

    No parque acuático de Cerceda

    Outro sitio para xogar con auga pode ser o parque acuático de Cerceda, un clásico da diversión estival. [Imaxe: Aquapark Cerceda]

  5. 05

    No parque acuático de Ourense

    Esta semana tamén abriu outro "parque acuático", en Ourense, impulsado pola Xunta, que de momento non ten tobogáns pero si varias piscinas nas que refrescarse. [Imaxe: CC-BY-SA Xunta de Galicia]

  6. 06

    Nunha poza

    Se Galicia ten case mil praias, tamén ten mil ríos, e en moitos deles hai pozas e piscinas naturais que en verán son outro bo recurso contra o calor. [Imaxe: CC-BY-SA Praza Pública]

  7. 07

    Nunha fraga

    Para quen non queira mollarse, as fragas galegas , con árbores autóctonas facendo sombra, son un bo destino para bañarse en frescor. [Imaxe: CC-BY-SA Xunta de Galicia]

  8. 08

    Na Mariña

    Se fai moito calor no resto de Galicia, é altamente probable que na Mariña non. Así polo menos o di a sabedoría popular, que entende que ao norte do alto da Xesta cada día pode ser unha aventura no climático. Iso si, coa auga máis quente que nas Rías Baixas. [Imaxe: CC-BY-SA Praza Pública]

  9. 09

    Baixo terra

    Baixo terra tamén é máis fácil atopar algo máis de frescura que na superficie. Así que a espeleoloxía pode ser unha actividade recomendable para os días de calor. A cova do Rei Cintolo, en Mondoñedo, é unha opción. [Imaxe: CC-BY-SA Praza Pública]

  10. 10

    De noite

    A temperatura baixa algo pola noite, e estamos a piques de entrar nas xornadas en que máis visible será a chuvia de estrelas das Perseidas. Así que os plans nocturnos de contemplación do ceo poden axudar contra o calor. [Imaxe: CC-BY-SA Xunta de Galicia]

  11. 11

    Nun frigorífico do Berbés

    Pasar frío en agosto, e en calquera época do ano, forma parte do traballo de moitas persoas. Por exemplo dos centos delas que traballan nas industrias frigoríficas ligadas aos portos galegos. [Imaxe: Autoridade Portuaria de Vigo]

  12. 12

    Nalgún transporte público

    Tamén hai quen pode morrer metaforicamente de frío só con empregar o transporte público. Porque hai un ano o Goberno implantou medidas para o aforro enerxético que implicaban un menor uso dos aires acondicionados e que se están a aplicar con maior ou menor sorte nos edificios pero que nalgúns medios de transporte non acaban de funcionar correctamente. [Imaxe: CC-BY-SA Praza Pública]