Vox non obtén representación en ningún dos 13 concellos en que presentaba candidatura en Galicia, con Baiona, co 4%, co seu mellor resultado en porcentaxe e A Coruña, con 2.655 votos (2,1%) en sufraxios. En Baiona a súa candidata era ata agora tenente de alcalde do PP e o seu número 2 fora o único cargo público da historia de UPyD en Galicia. Fronte aos 10.000 votos das municipais, nas europeas recibiu en Galicia 37.000, o 2,58%
“Os tiburóns son boa xente”, dille a Vinte Xaime Beiro, submarinista audiovisual de Louro e experto en 'motion graphics' que fala de nécoras, Instagram e o mar galego.
O PSOE gaña as autonómicas en 10 das 12 comunidades nas que se votaba agora excepto en Navarra e Cantabria, pero só ten asegurado gobernar grazas a unha maioría absoluta en Extremadura. O bloque da dereita obtén máis suma de votos en Castela e León, Aragón, Madrid e Murcia.
Más Madrid de Carmena gaña as eleccións pero a dereita suma para gobernar mentres que Maragall gaña a Colau e ERC obtén por primeira vez a alcaldía de Barcelona.
Restablecido o tráfico ferroviario entre Ourense e Zamora que quedara cortado polas obras do AVE. O corte estendeuse finalmente 48 horas máis do previsto. Ata a entrada en servizo definitiva da liña de alta velocidade Madrid-Galicia a circulación de trens neste treito obrigará a limitacións de velocidade de ata 30 quilómetros por hora en varios puntos.
Este domingo (12:30) o Obradoiro xoga a permanencia na ACB. Para permanecer na categoría debe gañar ao Barça; tamén a manterá se o Gipuzkoa perde fronte ao Real Madrid ou o Estudiantes cae ante o Joventut. O Breogán, pola súa banda, xoga este domingo o seu último partido na máxima categoría fronte ao Burgos tras consumar o descenso na pasada xornada.
26M | O PSdeG de Pontevedra denuncia na Xunta Electoral o reparto de panfletos a prol de ENCE no centro da cidade durante a xornada de reflexión por parte de persoal da compañía. Recólleo Pontevedra Viva. A eventual marcha da celulosa fóra da ría estivo, outra volta, moi presente na campaña electoral. (Imaxe: PSdeG Pontevedra)
O que arde, de Oliver Laxe, premio do xurado na sección Un certain regard no Festival de Cannes. É o primeiro filme proxectado en galego en toda a historia do festival. Para preparalo, o realizador conviviu con bombeiros forestais que loitan contra o lume nos montes de Ourense.
26M | Horizonte 2019: unha aplicación informática desenvolvida por 40 investigadores de diversas universidades, entre elas a de Santiago, convida a comprobar a afinidade coas diferentes forzas políticas que concorren ás eleccións ao Parlamento europeo do vindeiro domingo mediante un test anónimo. Pode realizarse nesta ligazón
Adif estende ata este domingo o corte da liña entre Ourense e Zamora polas obras do AVE iniciado hai 15 días e que debía finalizar este venres. A empresa pública non foi quen novamente de cumprir as súas propias previsións, incumprimentos que lle vén censurando a Comisión Nacional dos Mercados e a Competencia (CNMC). Ademais do actual corte, e doutros puntuais que se producirán a finais deste ano, ata a entrada en servizo do AVE o próximo ano a circulación de trens entre Zamora e Ourense estará condicionada en varios puntos por limitacións de velocidade de ata 30 quilómetros por hora.
