Feijóo anuncia a convocatoria dunha xuntanza para o luns 16 "cos principais partidos galegos" para "seguir compartindo a información que se nos traslade sobre o coronavirus" por parte do Goberno de España "e o estado da situación en Galicia". Este encontro fora reclamado por líderes de forzas políticas como Ana Pontón (BNG), onte, ou este mesmo mércores Gonzalo Caballero (PSdeG) e producirase tras unha videoconferencia, o sábado, con Pedro Sánchez e as presidencias das demais autonomías.
A Federación Galega de Fútbol suspende todas as competicións dela dependentes durante as dúas próximas semanas. Tras decretar a Federación Española e o Consejo Superior de Deportes a suspensión das competicións de rango estatal polo coronavirus, a galega fai o mesmo a partir deste xoves no seu ámbito en fútbol, fútbol sala e fútbol gaélico.
O lehendakari admite que o Goberno vasco estuda as vías legais dun eventual adiamento das eleccións polo coronavirus. "É unha decisión que debe tomar a Xunta Electoral" a partir de criterios de saúde pública, advirte. A convocatoria dos comicios vascos por parte de Urkullu para o 5A precipitou de vez o anticipo dos galegos para a mesma xornada. Feijóo abriu tamén a porta a unha posible suspensión.
As baixas por illamento a causa do coronavirus serán consideradas accidente laboral dende mañá. Civio explica os detalles do decreto publicado este mércores no BOE con estas e outras medidas, como as relativas ao subministro de material sanitario.
O Sergas confirma 27 casos de coronavirus en Galicia e outros 3, "pendentes de confirmación". Ampliamos a información das novas medidas de prevención anunciadas por Sanidade neste espazo de Praza.gal
A Federación Galega de Fútbol confirma que, seguindo as recomendacións sanitarias contra o coronavirus, "todas as competicións e eventos profesionais e non profesionais, xogaranse tamén en Galicia a porta pechada ata novo aviso". Nesta ligazón, lista completa das categorías atinxidas
A Liga de Fútbol Profesional anuncia que os partidos de, cando menos, as dúas vindeiras xornadas de Primeira e Segunda serán disputados a porta pechada para previr o coronavirus. No caso dos estadios galegos nestas categorías, a medida atinxe ao Celta-Villareal previsto para o vindeiro día 14 en Balaídos, ao Deportivo-Sporting do mesmo día en Riazor e ao Lugo-Zaragoza do día 22 no Anxo Carro. (Imaxe: RC Celta)
5A | A Xunta Electoral apercibe o PSdeG tras unha denuncia do PP por contratar publicidade que considera "propaganda electoral" fóra da campaña do 5A. Os populares denunciaron unha inserción publicitaria dos socialistas incluída en Praza.gal relativa ao apoio do PSdeG ás reivindicacións do 8M. O mesmo anuncio tamén fora incluído noutros medios. A autoridade electoral considerou que transgredía as limitacións da lei electoral por aspectos como figurar nel a imaxe do candidato do partido, Gonzalo Caballero, e ordenou retirala con data deste 9 de marzo, día no que concluía.
Hospitais do norte de Portugal suspenden as visitas e universidades como as do Porto e do Minho cancelan clases para previr o coronavirus. O Jornal de Notícias resume algunha das principais restricións que xa se aplican no país veciño.
Gciencia explica a razóns polas que lavar as mans con auga e xabrón é eficaz para combater axentes infecciosos como o coronavirus. Este vídeo do Sergas explica as principais medidas de prevención e actuación ante a doenza.