Fálase

5A | A Xunta Electoral apercibe o PSdeG tras unha denuncia do PP por contratar publicidade que considera "propaganda electoral" fóra da campaña do 5A. Os populares denunciaron unha inserción publicitaria dos socialistas incluída en Praza.gal relativa ao apoio do PSdeG ás reivindicacións do 8M. O mesmo anuncio tamén fora incluído noutros medios. A autoridade electoral considerou que transgredía as limitacións da lei electoral por aspectos como figurar nel a imaxe do candidato do partido, Gonzalo Caballero, e ordenou retirala con data deste 9 de marzo, día no que concluía.

• A Xunta Electoral obriga o PP a retirar ou modificar o vídeo de precampaña con simboloxía do Goberno galego

Hospitais do norte de Portugal suspenden as visitas e universidades como as do Porto e do Minho cancelan clases para previr o coronavirus. O Jornal de Notícias resume algunha das principais restricións que xa se aplican no país veciño.

Gciencia explica a razóns polas que lavar as mans con auga e xabrón é eficaz para combater axentes infecciosos como o coronavirus. Este vídeo do Sergas explica as principais medidas de prevención e actuación ante a doenza.

5A | O DOG publica este martes as candidaturas proclamadas para as eleccións galegas. Máis de medio cento de listas optan aos escanos do Parlamento na undécima lexislatura galega.

• Aberto o prazo para solicitar o voto por correo ata o 26 de marzo

O impacto do coronavirus e do devalo do prezo do petróleo provoca fortes caídas nas bolsas internacionais no inicio da semana. No inicio da xornada, a caída do Ibex rolda o 7%.

ENQUISA | O PP perdería entre 1 e 3 escanos o 5A, segundo unha enquisa de Sigma Dos para El Mundo que, como a de GAD3 para ABC, sitúa os populares entre unha cómoda maioría absoluta e o límite da perda do Goberno. Esta sondaxe prognostica que o PSdeG podería gañar ata 7 escanos (19-21) e o BNG, entre 6 e 7 (12-13). O novo Parlamento pecharíao Galicia en Común con entre 3 e 5 escanos.

ENQUISA | O PP móvese entre unha folgada maioría absoluta e o bordo de perder o Goberno, segundo unha enquisa de GAD3 para ABC que sitúa os populares entre 38 e 40 escanos. O inquérito augura fortes subas do PSdeG, con ata 6 escanos máis, e sobre todo do BNG, cun incremento de ata 8 escanos. Galicia en Común -á que GAD3 identifica como Común da Esquerda- sería cuarta forza con 3 ou 4 escanos, segundo a enquisa.

Comeza arestora na Coruña unha das principais manifestacións do 8M en Galicia, que descorrerá desde o Obelisco ata a Praza das Cigarreiras. Consulta aquí todos os actos do día.

Malestar sindical pola reunión este sábado da Xunta coa patronal pero non con representantes dos traballadores para trasladar “recomendacións sobre o coronavirus”. O xoves o propio Feijóo afeaba ao Ministerio de Traballo que emitise as súas propias recomendacións e pedía que fose o de Sanidade o que concentrase todas as actuacións. Ampliamos aquí os últimos datos sobre o coronavirus.

As 167 cartas que se enviaron Otero Pedrayo e Carvalho Calero estarán dispoñibles en internet. A Fundación Otero Pedrayo e o Consello da Cultura Galega colaboran para facilitar o acceso ás 85 misivas de Otero Pedrayo depositadas no Parlamento de Galicia e as 82 de Carvalho Calero na Fundación Penzol. Hai unhas semanas presentouse a programación do Ano Carvalho Calero.