O Consello Regulador do Mexillón de Galicia advirte dos perigos de proxectos mineiros como o de Touro para a riqueza das rías galegas. No seu último boletín, o departamento de I+D+i da DOP asegura que as administracións deben "aplicar o principio de precaución para protexer o mexillón".
A Xunta licita a construción da nova estación de autobús de Santiago anexa á estación de tren cun prazo de execución de 18 meses. Custará 10 millóns de euros e terá 36 dársenas. No acordo a tres bandas, o Goberno central ampliará a estación ferroviaria e o Concello de Santiago habilitará os accesos.
Admitida a trámite a demanda presentada polo Concello de Santiago para que a familia Franco devolva as figuras do Mestre Mateo. O Concello informa de que o xulgado de primeira instancia 41 de Madrid empraza á demandada a contestar no prazo de 20 días hábiles.
Imputado o presidente de Adif, Juan Bravo, no caso Lezo, que investiga a xestión do Canal de Isabel II na época de Gallardón. Bravo e outros ex-conselleiros da Comunidade están chamados a declarar entre o 10 e o 15 de xaneiro.
O pleno do Concello de Lugo rexeita a cuestión de confianza ligada aos orzamentos formulada pola alcaldesa. O resultado foi de 12 votos en contra (PP, Ciudadanos e ACE), 5 abstencións (Lugonovo e BNG) e 8 votos a prol (os do PSdeG). Se no prazo dun mes a oposición non formula unha moción de censura contra o goberno de Lara Méndez, as contas de 2018 ficarán aprobadas inicialmente.
Espazo Lectura pide "unha biblioteca digna para Gondomar" na Árbore dos Desexos instalada no concello. A entidade, con 12 anos de actividade, leva meses reclamando melloras na biblioteca municipal da localidade e mantendo unha posición moi crítica co Goberno local
Xa temos palabra do ano! Cun 48 por cento dos apoios, afouteza foi a escollida na votación organizada polo Portal das Palabras, na que participaron 6.228 persoas, superando a independencia e sapoconcho
O despregamento policial extraordinario en Catalunya remata o día 30. Os efectivos de Policía e Garda Civil foron enviados polo Goberno de España como resposta ao proceso soberanista e estiveron aloxados maioritariamente en barcos no porto de Barcelona.
A alcaldesa de Lugo sométese este mércores a unha cuestión de confianza ligada aos Orzamentos de 2018. De non ser aprobada, abriríase un prazo dun mes para a presentación dunha eventual moción de censura e, se non fose rexistrada, as contas quedarían aprobadas. O PP di estar disposto a "calquera negociación" para tombar o goberno de Lara Méndez, aínda que para a operación sería imprescindible algún voto das forzas de esquerda.
As construtoras realizan as probas de carga da ampliación da ponte de Rande en pleno temporal. Estas probas, que recolle Faro de Vigo, foron realizadas a pasada noite co visto e prace do Ministerio de Fomento. Audasa acelerou o remate destes carrís adicionais para poder cobrar máis peaxe por eles dende o 1 de xaneiro. Está previsto que as obras sexan inauguradas por Rajoy a fin de semana.
