Este serán celébrase no Teatro Rosalía Castro da Coruña a gala dos XXIII Premios de Teatro María Casares. 'Commedia', 'Divinas Palabras Revolution' e 'A leituga' encabezan a lista de obras finalistas. Podes seguir ao vivo a retransmisión da entrega en Praza.gal. E este venres, en Praza, o máis destacado da cerimonia coas persoas e obras gañadoras.
A planta de Alcoa da Coruña non poderá presentarse á próxima poxa de ininterrompibilidade ao renunciar a multinacional á anterior para os primeiros seis meses do ano. Mentres o Estado segue a confiar en atopar "investidor", a empresa ameaza mesmo con pechar en San Cibrao.
Hoxe é o Día Mundial da Síndrome de Down. Neste vídeo a federación Down Galicia explica que é a síndrome e subliña que as persoas que a teñen son suxeitos de dereitos como o resto da cidadanía. "Reivindicamos as capacidades das persoas e os dereitos que lles corresponden como cidadás", resumen.
O ata agora cabeza de lista de Podemos ás europeas, Pablo Bustinduy, anuncia a súa retirada da política institucional. O número 1 da formación será agora para María Eugenia Rodríguez Palop, que ía ser a segunda na candidatura. Bustinduy, deputado no Congreso na última lexislatura, destacou en diversas sesións parlamentarias polos seus discursos en materia de política internacional.
Marilar Aleixandre, Premio á Contribución Sobresaliente á Investigación de 2019, que concede a Asociación Estadounidense de Didáctica nas Ciencias. É o galardón máis importante do mundo nesta área. Ata agora só o lograran catro docentes de orixe europea, tal e como destaca a USC.
Theresa May esixe ao Parlamento británico que vote saír da UE con ou sen acordo ou non saír. Mentres, o Consello Europeo condiciona a prórroga do Brexit a que a primeira ministra logre que a Cámara dos Comúns aprobe o plan para saír da Unión.
A Comisión Europea multa a Google con 1.494 millóns de euros por atentar contra a competencia co seu sistema de publicidade AdSense
O TSXG confirma a condena a dous anos de cadea e multa de 350 euros a un veciño de Cambre por pagar cun billete falso de 50 euros unha pizza que pedira a domicilio. Ratifica a sentenza na que a Audiencia da Coruña o considerou culpable dun delito de tenza de moeda falsa e doutro leve de estafa.
Touro. O rural no que pasaban cousas nos noventa. Esta reportaxe de Vinte achégase á cultura xuvenil de numerosas vilas do rural galego nos anos 90 a través da memoria colectiva de quen a viviron en primeira persoa. Tempos de traballo, cartos... e Luar.
Té con Gotas publica o seu novo podcast desde Inglaterra. Desta vez, este espazo de debate e análise galega desde Reino Unido céntrase no Brexit tras os últimos acontecementos e a nove días da data oficial da saída da UE. Na entrevista, Saleta Chao Rivas, pedagoga de Cuntis que traballa en Londres nun proxecto pioneiro de intervención familiar.
