Naturgy anuncia que subministrará gratuitamente electricidade e gas a todos os hoteis e residencias que cedan as súas instalacións á Sanidade Pública para facer fronte ao Coronavirus. A compañía aprazará tamén as facturas de luz e gas de pemes e autónomos que se emitan a partir de agora; poderán pagarse na segunda metade do ano
España supera os 1.000 falecementos polo coronavirus e rolda as 20.000 persoas contraxiadas (19.980), con 1.141 persoas ingresadas na UCI, segundo vén de confirmar Fernando Simón en rolda de prensa. Madrid suma a metade das mortes e máis dun terzo dos positivos. A Xunta detallará os datos galegos a última hora da mañá. O Ministerio de Sanidade alertou este xoves que o pico de contaxios "se achega".
Loito en Comisións Obreiras polo falecemento do coruñés José Luis Paz Pena polo coronavirus. "Paz Pena sempre será lembrado polo seu compromiso sindical dende a súa militancia nas CCOO dende a clandestinidade, loitando contra o franquismo e construíndo a organización do Sindicato Nacional de CCOO de Galicia", sinalan. O veterano sindicalista tiña 75 anos e é o quinto falecido en Galicia polo virus. Os seus compañeiros do sindicato animan a transmitira as condolencias polo seu pasamento a través do Facebook da organización ou por correo electrónico.
ESPECIAL #VINTENAREDE. Como o vídeo en internet nos axuda a levar o confinamento polo coronavirus. VINTE fai un repaso polos contidos e iniciativas máis interesantes destes días
O Banco Central Europeo anuncia unha inxección de ata 750.000 millóns de euros polo coronavirus e contempla a compra de débeda tanto pública como privada.
O rei Felipe VI afirma nunha mensaxe televisada que "o virus non nos vencerá" senón que "nos fará máis fortes como sociedade"; ademais, agradeceu o esforzo do persoal sanitario, que cualificou como "a nosa primeira liña de defensa". O discurso do monarca foi respondido en moitas casas por una cazolada convocada para pedir que se obrigue ao rei emérito Juan Carlos a doar á sanidade pública os 100 millóns que recibiu de Arabia Saudí en paraísos fiscais. Ampliamos a información neste espazo
Así se reparte a comida ás persoas confinadas en Beijing ao chegaren do estranxeiro para previr o coronavirus. As autoridades da cidade chinesa esixen facer corentena á poboación que chega doutros países e, se non poden ficar illadas na casa, son enviadas a un hotel no que a alimentación é distribuída mediante estas máquinas (Imaxes: He Mao/Cedidas)
A Escola Superior de Conservación e Restauración de Bens Culturais de Galicia, con sede en Pontevedra, entrega "todo o material" do que dispón e "pode ser de utilidade" para "os equipos sanitarios que loitan contra o coronavirus, caso das luvas que utilizan habitualmente no seu traballo. Imaxe divulgada pola escola.
A Xunta Electoral de Galicia avala a suspensión das eleccións galegas polo coronavirus, que hoxe formaliza o Consello da Xunta, e o procedemento proposto polo Goberno galego tras a xuntanza cos partidos políticos para adialas. A autoridade electoral concorda en que a mellor vía é reiniciar o proceso electoral íntegro tras o estado de alarma e a emerxencia sanitaria.
Pedro Sánchez comparece ante o Congreso, cun hemiciclo practicamente baleiro, para explicar o estado de alarma vixente a causa do coronavirus. Pódese seguir ao vivo na canle institucional da Cámara Baixa.