Fálase

Sanidade prevé abrir unha nova quenda de autocitas para a vacinación contra a COVID con 50.000 prazas para a vindeira semana, dirixidas a persoas que aínda non recibiron ningunha dose. Serán para o martes (10.000) 7, venres 10 (10.000) e sábado 11 (30.000). Así o avanzou este xoves o presidente da Xunta, Alberto Núñez Feijóo, quen se volveu laiar de escaseza de doses porque "necesitamos ir máis rápido" entre a poboación de 12 a 19 anos, aludiu, despois de que na anterior apertura de autocitas só se cubrisen a metade dos 30.000 ocos ofrecidos. A autocita tramítase no espazo de citas do Sergas,  no portal E-Saúde ou mediante a aplicación Sergas Móbil.

• DATOS | Galicia deixa atrás o peor da quinta vaga da pandemia mentres acada o 75% de poboación vacinada coa pauta completa

A Xunta publica no DOG os cambios nos niveis de restricións da COVID por concellos, en vigor dende o vindeiro sábado. Podes consultar aquí as medidas que atinxen a cada municipio.

• Melide únese a Monforte e Ordes no nivel máximo de restricións, con 21 concellos en nivel alto
• MAPA INTERACTIVO | Restricións da Xunta pola COVID

PARO REXISTRADO | As inscricións nas oficinas de emprego de Galicia diminuíron en 670 durante o mes de agosto, o que en termos porcentuais supón un -0,44% (a media estatal é do -2,42%) e o paro rexistrado queda en 151.264 persoas, 25.687 menos que hai un ano. No mesmo mes, a afiliación media á Seguridade Social aumentou en 3.198 persoas e queda en 1,39 millóns, o que supón 26.676 máis que en agosto de 2020. 

• AMPLIAMOS 👉 A fin da temporada alta de verán destrúe 12.000 empregos nos últimos días de agosto en Galicia

España acada o obxectivo de vacinar o 70% da poboación en oito meses. O 70,3% dos residentes no Estado teñen a pauta completa logo de seren inmunizadas case 33,4 millóns de persoas. 

Este mércores botou a andar unha nova edición do Festival de Cans, onde este xoves serán protagonistas o historiador Ian Gibson (polo documental 'Donde acaba la memoria') e Xosé Manuel Beiras, polo filme 'Beiras, vivir dúas veces', que se proxectarán no Centro Cultural Municipal do Porriño.

• O Festival de Cans recupera a súa 'normalidade' e chega á maioría de idade con "responsabilidade e resistencia"

Pedro Sánchez confirma unha suba "inmediata" do salario mínimo, xa no mes de setembro. O obxectivo é que alcance o 60% do soldo medio cando remate a lexislatura. 

A atleta lucense Adiaratou Iglesias obtivo a medalla de ouro nos Xogos Paralímpicos de Toquio nos 100 metros T13 (discapacidade visual). Iglesias foi felicitada pola Deputación de Lugo, que a través de Efrén Castro, Deputado de Deportes, destacou que a atleta "acaba de dar unha lección de superación e sacrificio con este ouro do que nos sentimos plenamente orgullosos”

Ordes, Melide e Monforte estarán dende este sábado no nivel máximo de restricións, segundo acordou a Xunta despois da xuntanza do Comité Clínico que asesora á Consellaría de Sanidade. Outros 21 concellos situaranse no nivel alto: Agolada, Arzúa, Lalín, O Pino, Trazo, Curtis, Cee, Cerceda, Muxía, Antas de Ulla, Monterroso, Palas de Rei, Vilalba, A Pastoriza, Castro de Rei, Meira, O Saviñao, A Pobra de Trives, Viana do Bolo, Ares e A Cañiza.

A Comisión Europea anuncia que o 70% da poboación adulta da UE xa ten a pauta completa da vacina contra a COVID. A presidenta, Ursula von der Leyen, aclara que os 27 acadaron o obxectivo fixado a principios de ano para o final do verán. A porcentaxe de persoas maiores de 12 anos coa pauta completa acada o 81,6% en Galicia e o 77,9% no conxunto do Estado Español (74,1% e 69,1%, respectivamente, sobre o total da poboación)

A xustiza condena o Concello da Coruña por vulnerar o dereito de participación polítca da Marea Atlántica. A alcaldesa Inés Rey impediu ao grupo e ao PP debater emendas aos convenios nun pleno do pasado febreiro.