Pedro Sánchez volve contemplar o inicio da mesa de diálogo co Goberno catalán antes das eleccións anticipadas ao Parlament de Catalunya. Moncloa desbotáraa, pero vén de rectificar tras unha xuntanza entre o propio Sánchez e Gabriel Rufián, voceiro de ERC, formación coa que pactara o inicio desta negociación.
Guadi Galego recollerá o 20 de febreiro en Madrid o Premio á Promoción da Realidade Plurilingüe do Estado Español, que todas as autonomías plurilingües lle concederon o pasado novembro polo seu disco Immersion, que inclúe pezas en todos os idiomas da Península Ibérica
O Goberno central asina a suba do salario mínimo interprofesional a 950 euros cos sindicatos CC.OO e UGT e coa patronal CEOE. No acto para ratificar o acordo coas devanditas entidades sindicais e patronal participou o presidente do Executivo central, Pedro Sánchez, xunto co vicepresidente Pablo Iglesias, a vicepresidenta Nadia Calviño e a ministra de Traballo, Yolanda Díaz. (Imaxe: Fernando Calvo/Goberno de España)
Falece aos 78 anos Mauro Varela, ex-presidente da desaparecida Caixa Galicia, segundo informa El Progreso. Avogado de profesión, foi tamén deputado do PP no Parlamento e no Congreso.
O Consello da Xunta aproba o anteproxecto da lei de acción exterior de Galicia que anunciara Feijóo o pasado verán. O Goberno galego regulara esta materia por decreto tres anos antes. Neste espazo de Praza.gal, representantes das principais forzas políticas e mais o director xeral de Relacións Exteriores da Xunta explicaron as súas prioridades neste ámbito.
Pilar de Lara cesa como titular do xulgado de instrución número 1 de Lugo ao facerse efectiva a sanción de 7 meses interposta polo Poder Xudicial, que implica a perda do seu destino en Lugo. Xusto antes, De Lara emitiu un auto para negarse a dividir en 32 pezas o asunto central da operación Pokémon, como pedía a Fiscalía. Ampliamos neste espazo toda a información
R indica que ten "en proceso de solución" a incidencia que deixou sen conexión a internet a centos de fogares, institucións e empresas por toda Galicia. "Estamos a recuperar o servizo de internet fixo e móbil de forma gradual", indican. Algunhas das institucións afectadas, como a Xunta, xa comezaron a recuperar o servizo.
Un fallo no servizo de R deixa sen internet fixo e móbil a multitude de fogares, empresas e institucións por toda Galicia, entre elas á Xunta -que recuperou os seus servizos web pouco despois das 10 da mañá-. "Xa están os nosos técnicos a traballar para intentar resolvelo o antes posible", indica a compañía.
O escritor Manuel Rivas subliña que, como académico da RAG, "non asistirei a ningún acto no que estea o presidente da Xunta" mentres "non derroguen o decretazo de exterminio do idioma galego". "É o que levo tempo facendo", engade nas redes sociais.
A CIG convoca mobilizacións para este serán baixo o lema Recuperar dereitos para avanzar coa derrogación das reformas laborais e medidas para protexer a industria ou as pensións no centro das reivindicacións.