5A | A presidenta de Madrid pide "aglutinar o voto" da dereita "en torno a Núñez Feijóo" porque "por un escano, pódese perder Galicia", sinalou Isabel Díaz Ayuso, que en declaracións que destaca EFE e recolle o xornal El Progreso aposta por apuntalar unha nova maioría absoluta do PP galego. (Imaxe: PP)
Declarado un incendio forestal en Ortigueira, na parroquia de Couzadoiro. Segundo Medio Rural, "afecta a unhas 20 hectáreas". Toda a costa galega está hoxe en alerta laranxa por fortes ventos. (Imaxe: Google Maps). Bombeiros forestais tamén dan conta doutro incendio no Barco de Valdeorras, non sinalado na información oficial da Xunta. O lume foi dado por controlado en Ortigueira contra as 15h.
A Xunta anuncia que publica mañá mañá as primeiras convocatorias para funcionarizar persoal laboral, con algo máis de 1.300 prazas. Segundo o o avanzado o pasado decembro, o proceso chegará a 1.424 persoas con condición de persoal laboral fixo. Hai sete anos, Feijóo anunciara a funcionarización para 6.000.
5A | O PP retería a maioría absoluta por apenas dous escanos, segundo unha enquisa de Metroscopia para El Confidencial, que outorga 39 escanos aos populares, 2 menos que en 2016. O PSdeG sería segunda forza con dous escanos máis que hai catro anos, seguido moi de cerca do BNG, que sería o grupo con maior crecemento, duplicando amplamente a súa representación. Galicia en Común completaría o hemiciclo con 6 escanos, segundo o inquérito. A sondaxe foi realizada os pasados días 11 e 12, cadrando coa convocatoria electoral.
O persoal da CRTVG mobilizado na plataforma Defende a Galega chega ao venres negro número 91. "Ante a próxima cita coas urnas, agardamos expectantes polos compromisos para a CRTVG que están dispostos a plasmar os partidos políticos", resaltan, subliñando como principal reivindicación o cumprimento íntegro da lei dos medios públicos do ano 2011.
Gómez-Reino manifesta a súa disposición a "encabezar unha candidatura á Presidencia da Xunta". Son declaracións do secretario xeral de Podemos Galicia á TVG tras o inicio do proceso de primarias da súa formación e mentres continúan as negociacións do partido con Anova e as mareas municipais á procura dunha complexa coalición. De fracasaren os contactos, todo apunta á conformación de dúas candidaturas diferentes.
O Tribunal Europeo de Dereitos Humanos, institución dependente do Consello de Europa, avala as 'devolucións en quente' na fronteira sur de España.
O xuíz envía á cadea por risco de fuga ao ex-director de Pemex detido en Marbella. Emilio Lozoya, apreixado polo caso Odebrecht, tamén está a ser investigado pola compra de Barreras avalada pola Xunta.
Barreras di adeus a un contrato de 300 millóns tras adxudicar Havila os cruceiros ao turco Tersan, tal e como conta Faro de Vigo.
Abanca converterase no maior accionista do Deportivo ao converter en títulos 35 millóns de débeda. O club coruñés convocou unha xunta de accionistas para o 17 de marzo onde solicitará unha ampliación de capital de 70 millóns de euros e confirma as intencións manifestadas polo banco e a entidade deportiva en xaneiro.
