Remite o temporal, que onte deixou ventos de 141,5 km/h en Carnota e máis de 120 km/h en Viveiro, Cedeira e Malpica e que obrigou a cortar a A6 entre Pedrafita e Baralla algunhas horas. Hoxe haberá algunhas chuvias dispersas, con neve por riba dos 600 metros, e o domingo Galicia estará baixo a influencia dun anticiclón.
Estados Unidos ameaza a Nicolás Maduro con ser enviado á prisión de Guantánamo se non abandona o poder en Venezuela. Afirmouno John Bolton, asesor de seguridade nacional de Donald Trump. (Imaxe de arquivo divulgada pola Casa Branca)
Vinte estrea o novo videoclip de Atrás Tigre, ABISAL, o tema co que a banda participa no recompilatorio Galician Bizarre III. O realizador do vídeo é o creador Jesús Castro Yáñez. Pódelo ver en exclusiva aquí
O temporal está a deixar numerosas incidencias por toda Galicia. Ata as 8 da mañá foran un total de 72, a maioría por caída de árbores e pólas nas estradas e tamén asolagamentos, segundo informa o 112. A neve está a provocar dificultades para circular en áreas montañosas de Ourense e Lugo. A alerta meteorolóxica é vermella no litoral atlántico e laranxa, no cantábrico. Na imaxe, a autovía A-6 preto de Pedrafita.
Hoxe comeza en Madrid o proceso xudicial do Concello de Santiago contra os herdeiros de Franco para a devolución das esculturas do Mestre Mateo orixinarias da Catedral compostelá. Ás portas dos xulgados o alcalde, Martiño Noriega, advertiu que a familia teme que o xuízo xere un "precedente" para recuperar o patrimonio espoliado pola ditadura. O máis destacado da sesión, hoxe en Praza.gal
En marcha o traslado dos dirixentes independentistas cataláns presos a cárceres madrileños entre mobilizacións a prol da súa liberdade. O Supremo decidiu trasladar os dirixentes para o inicio do xuízo contra eles, que comeza a vindeira semana. (Imaxe: ANC)
Os concelleiros José Manuel Sande, Eugenia Vieito e Daniel Díaz Grandío confirman que non repetirán na candidatura da Marea Atlántica para as vindeiras municipais. O alcalde da Coruña, Xulio Ferreiro, transmitiu as "grazas polo esforzo" dos últimos anos tras faceren pública a decisión. A fin de semana remata o prazo de candidaturas das primarias da formación.
Con case cinco anos de atraso, o Consello da Xunta aproba definitivamente o decreto que regula a Renda de Inclusión Social de Galicia (Risga). O DOG publicará nos próximos días un texto que a Lei de inclusión social aprobada a finais de 2013 obrigaba a ter listo en seis meses e que ata dous conselleiros, Mato e Rey Varela, non foron quen de rematar.
O xulgado denega a suspensión cautelar da baixada dos prezos do autobús urbano da Coruña pretendida pola empresa concesionaria. As novas tarifas aprobadas polo Concello entrarán en vigor mañá, segundo o previsto inicialmente, segundo vén de informar o goberno local. Consulta aquí toda a información
O Athletic de Bilbao bate o récord europeo de asistencia a un partido de fútbol feminino con 48.121 persoas a presenciar en San Mamés o encontro do equipo vasco fronte ao Atlético de Madrid nos cuartos de final da Copa da Raíña.