O DOG publicará este venres a resolución para solicitar praza nas escolas infantís da Xunta e incluirá o requisito de que as nenas e nenos teñan postas todas as vacinas obrigatorias, segundo avanzou o presidente da Xunta este xoves ao remate do Consello.Este requisito xa recibiu o visto e prace da Asesoría Xurídica do Goberno galego.
A táboa periódica dos elementos químicos xa está dispoñible para súa descarga en galego. Foi editada polo Consello da Cultura no marco da xornada que conmemora o 150º aniversario da publicación da primeira edición da táboa por Dimitri Mendeleev. Será remitida a centros educativos aínda que, como a Guía dos elementos químicos, non poderá ser utilizada nas aulas da ESO porque o vixente decreto lingüístico non permite impartir as materias de ciencias en lingua galega.
O BNG propón "un debate electoral ao máximo nivel entre líderes das forzas políticas con representación no Parlamento" antes das eleccións xerais na TVG. O coordinador da campaña do Bloque, Rubén Cela, cre que un debate semellante ao celebrado polas xerais de 2008 permitiría que "se fale de Galiza" antes do 28A e di agardar que "aínda que o medo é libre, Feijóo non se escaquee".
Ciudadanos anuncia que a deputada Marta Rivera, lucense residente en Madrid, provincia pola que obtivo o seu escano no Congreso nas anteriores xerais, será candidata pola Coruña no 28A. Segundo un comunicado do partido, José Manuel Blanco será número 1 por Lugo, Inés Iglesias por Ourense e Beatriz Pino, responsable de prensa da formación, por Pontevedra.
O PP fai circular por WhatsApp unha campaña na que os personaxes Epi e Blas instan a concentrar o voto da dereita nos populares e cargan contra o PSOE. É unha información de Gonzalo Cortizo en eldiario.es
O xulgado de Tui decreta a liberdade provisional do propietario do almacén pirotécnico que estoupou en maio de 2018 causando dúas mortes. A xuíza considera que sería "excesivo e desproporcionado" mantelo en prisión provisional e considera que non hai risco de que poida "ocultar, alterar ou destruír fontes de proba" da almacenaxe irregular dos explosivos.
A UE suspende os voos dos avións Boeing 737 MAX no seu espazo aéreo tras o accidente aéreo en Etiopía. Javier Pedreira Wicho explica neste artigo cal é o sistema polo que é cuestionado este modelo de aeronave.
O PSOE sería a forza máis votada nas eleccións xerais pero as dereitas sumarían maioría absoluta para gobernar, segundo unha enquisa de Celeste-Tel para eldiario.es
A esta hora están a celebrarse en toda Galicia concentracións en repulsa polo asasinato machista que tivo lugar en Valga este domingo
A proposta de Theresa May para o Brexit, acordada coa UE, volve ser rexeitada polo Parlamento británico (242 votos a favor, 391 en contra), deixando a Primeira Ministra nunha posición moi difícil. Este mércores celebrarase unha nova votación, desta volta para aceptar ou non un Brexit sen acordo.
