Abel Caballero anuncia que o acendido das luces de nadal de Vigo será este sábado día 24 ás 19.30 horas. “O alcalde de Nova York terá que poñer gafas de sol”, chancea, e engade que “os de Vigo non temos que mercar gafas de sol porque como as luces son nosas non nos fan dano”. O rexedor vigués di que agarda “milleiros” de visitantes ese día e prepara un plan especial de tráfico. Colectivos da cidade xa criticaron o gasto nesa decoración.
A Fundación Franco divulga un listado de misas polo cabodano do ditador que inclúe unha en 'Ferrol del Caudillo'. Segundo a fundación, a única conmemoración en Galicia será este martes ás 12.30 na igrexa de San Francisco. A misa chega en pleno proceso do Concello por rematar cos vestixios franquistas na cidade.
Os papeis de Bárcenas substraídos por Interior na operación Kitchen inclúen documentación do financiamento en 'B' do PP galego, segundo El Mundo. A existencia dese financiamento irregular foi reiterada a pasada semana no Congreso por Pablo Crespo, ex-secretario de organización do PPdeG e número dous da trama Gürtel, quen afirmou que con eses cartos o partido pagaba "sobresoldos" a "políticos e xornalistas".
O comité intercentros chama á "participación de todo o persoal" na folga que mañá comeza na CRTVG. Culpa do "desmantelamento" á actual dirección, que convocou o comité de folga para unha xuntanza o vindeiro xoves.
Falece unha muller en Viveiro por mor das fortes chuvias que asolagaron o centro da localidade. O desbordamento do río en Ponte Labrada anegou vivendas, garaxes e baixos comerciais, segundo informa o 112.
A CRTVG publica os servizos mínimos para a primeira parte da folga nos medios públicos, que comeza mañá con paros de dúas horas. Estes servizos mínimos foron aprobados sen acordo coa representación do persoal mobilizado tras rachar a negociación.
Unha concentración na Alameda de Santiago de Compostela protestou contra o proxecto mineiro de Touro-O Pino, cualificado como "a ameaza dun novo Prestige" para o río Ulla e a ría de Arousa
O PSdeG-PSOE celebra este domingo as primarias para elixir os seus candidatos ás alcaldías da Coruña, Ferrol e Ourense. Catro aspirantes na cidade herculina e dous en cada unha das outras cidades optan á designación. No resto de localidades de máis de 20 mil habitantes xa foron escollidos os candidatos.
Os "Cortegadaos" de Cortegada e "Pequenos Besbellos" de Pontevedra gañan o certame Quero Cantar da Deputación da Coruña
Un terremoto de 3,8 graos sentiuse en boa parte do sur da provincia de Pontevedra. O tremor produciuse ás 20:55 horas, con centro entre Monção e Melgaço. En agosto Taboada sufriu un terremoto de 4 graos e na pasada primavera Ponte Caldelas experimentou un enxame sísmico, con varias ducias de tremores. Un de 5,1 graos (en Triacastela, en 1997) segue a ser o maior dos rexistrados en Galicia dende que hai medicións precisas.
