Fálase

O secretario xeral do PSdeG, Gonzalo Caballero, visitou este sábado o parque natural das Dunas de Corrubedo, onde cualificou cun "suspenso" a política medioambiental da Xunta. Caballero avogou por unha lei galega contra o cambio climático e lembrou que só dous dos seis parques naturais galegos contan cun plan de usos e xestión; no caso de Corrubedo “houbo que agardar 30 anos para que saíra adiante", apuntou. Ademais, denunciou que só tres das 72 especies en perigo de extinción contan en Galicia co plan de recuperación que esixe a lei.

A Cadena SER adianta que Pedro Sánchez anunciará este sábado unha remodelación do seu Goberno, con cambios que "afectarán a carteiras fundamentais e ás estruturas de coordinación do Gabinete" pero da que quedarán fóra os departamentos responsabilidade de Unidas Podemos. Segundo esta información, tomarán posesión o luns e xa acudirán ao Consello de Ministros do martes.

O BNG presenta a súa campaña do Día da Patria baixo o lema 'Galiza sen límites'. A portavoz nacional da formación, Ana Pontón, sinala que a campaña pretende transmitir "que é posíbel construír unha Galiza con futuro, basta con ter un liderado político sen ataduras que confíe no potencial do país". Terá como acto central a tradicional manifestación do Bloque o propio 25 de xullo en Santiago, adaptada por segundo ano ás restricións da pandemia.

A xuíza envía a prisión provisional a tres dos catro primeiros detidos polo asasinato de Samuel Luiz. Están investigados por "homicidio ou asasinato", segundo confirman fontes do TSXG, que indican que o tipo delitivo que lles é imputado será "definido no transcurso da instrución" xudicial. A cuarta detida queda coa obriga de comparecer no xulgado. 

• AMPLIAMOS 👉 A xuíza envía a prisión a tres dos acusados do asasinato de Samuel por risco de fuga e destrución de probas

Dúas detencións máis polo asasinato de Samuel Luiz, neste caso dous menores de idade, segundo confirma a Delegación do Goberno de España en Galicia. Confírmanse na mañá en que os catro primeiros detidos, tres homes e unha muller maiores de idade, pasaron á disposición do xulgado de instrución número 1 da Coruña tras seren acusados pola Policía de homicidio e un deles, tamén de apropiación indebida.

Así soa 'Figa', o novo de Tanxugueiras. Tras a estrea de 'Midas' o pasado febreiro, este é o "segundo avance da nova sonoridade e proposta musical" do grupo, que "mestura os ritmos e bases urbanas e líricas propias con coplas e cantos tradicionais", explican. O videoclip, dirixido por Trece Amarillo (Diego M. Barcia e Diego Santaclara) rodouse en maio en varios puntos da Provincia de Pontevedra, entre eles terreos da Comunidade de Montes de Salcedo, a nave de Global Setup ou o Pazo de Señoráns e tivo a colaboración de persoal de extinción de indencios.

A triatleta e médica viguesa Susana Rodríguez Gacio, na capa da prestixiosa revista Time. A deportista galega é entrevistada pola publicación no marco dunha ampla cobertura sobre "heroes que axudaron na batalla contra a COVID antes de competiren nos Xogos Olímpicos e Paralímpicos de Tokio" 

A incidencia acumulada da COVID en 14 días nas persoas entre 20 e 29 anos en Galicia dispárase por riba dos 400 casos por cada 100.000 habitantes e rolda esa cifra nas persoas de 12 a 19 anos, máis de tres veces a media do conxunto da poboación.

• As áreas de Pontevedra e Ourense encabezan a incidencia da COVID na xornada con máis casos rexistrados dende febreiro

O Parlamento Europeo reclama á Comisión que restrinxa os fondos de recuperación a Hungría pola súa lexislación homófoba. Fíxoo con 459 votos a prol e 147 en contra e 58 abstencións, entre elas as do PP agás o eurodeputado Esteban González-Pons, que apoiou a medida. Na imaxe, o primeiro ministro húngaro, Viktor Orbán, en 2018 na Eurocámara.

• HEMEROTECA (2018) | O PP abstense na votación da Eurocámara para sancionar o goberno ultradereitista de Orbán

Feijóo afirma que "hai algúns partidos que en función de quen sexa o autor ou a vítima condenan con maior ou menor intensidade os asasinatos" e reprocha que "algún grupo parlamentario en Galicia" está a "facer política" co asasinato de Samuel Luiz. Preguntado tras o Consello da Xunta a respecto das súas primeiras consideracións sobre o acontecido, o presidente da Xunta reitera que o Goberno galego condena "calquera acto de violencia" e "calquera tipo de homofobia" e engadiu que a Policía aínda non aclarou a "causa directa ou indirecta" deste asasinato.

• A Policía acusa de homicidio aos catro detidos por matar a Samuel Luiz e a un deles, tamén de apropiación indebida