O PP volve propoñer o ex-alcalde de Ourense, Jesús Vázquez, e a ex-líder do partido en Vigo, Elena Muñoz, como senadores por designación do Parlamento de Galicia Ambos ex-conselleiros xa foran designados para estes postos o pasado xuño. O Parlamento ten que volver designar tres prazas na Cámara Alta tras as eleccións xerais. A terceira praza será para o socialista Xoaquín Fernández Leiceaga, por ser agora o PSdeG a segunda forza parlamentaria.
As clases continuarán suspendidas este venres na montaña de Lugo por mor do temporal de neve. Na zona agárdanse espesores superiores aos 20 centímetros. Na imaxe -de arquivo-, unha máquina quitaneves da Deputación de Lugo.
A alerta vermella no mar deixa ondas de ata 11 metros en Estaca de Bares e refachos de vento superiores aos 120 quilómetros por hora en Malpica ou Lira e de máis de 100 km/h na Coruña, segundo Meteogalicia. Entre as principais incidencias atendidas polo 112 destaca un tornado que tirou "varias árbores e cables de alumeado público" en Arteixo e estragos nun pendello en Ordes, así como numerosas incidencias no tráfico.
Máis de 200 persoeiros do mundo académico e cultural internacional asinan un manifesto que reclama unha "rolda de negociacións" para "unha saída política" ao "conflito" en Cataluña. Entre as persoas que o impulsan figuran sinaturas galegas como as de María Xosé Agra, Xosé Manuel Pereiro, Manuel Rivas, Víctor Sampedro ou Suso de Toro. O texto íntegro do manifesto pódese consultar aquí e nesta ligazón é posible asinalo.
Tal día coma hoxe de hai 30 anos faltaba apenas un mes para as eleccións galegas. Manuel Fraga foi entrevistado en catalán nun espazo de humor de TV3 presentado por Jaume Perich, que o cuestionou sobre asuntos tan diversos como a URSS, as drogas, o alcol, as súas experiencias co amor ou a súa opinión a respecto da pornografía. A canle catalá recuperou hoxe o vídeo.
A Xunta investiga outros catro pazos na provincia de Lugo pola posible celebración de vodas sen licenza. A Axencia de Turismo xa abriu expediente a varios establecementos logo de que o verán destapase moreas de irregularidades.
A neve dificulta a circulación en áreas montañosas da provincia de Lugo. A montaña lucense está hoxe en alerta laranxa por nevaradas. Na imaxe, a autovía A-6 en Pedrafita ás 9:13 desta mañá.
O reconto CERA e a revisión de erros en varias mesas resta un escano ao PNV por Biscaia, que vai para o PP. O PP queda así con 89 representantes no novo Congreso e o PNV, con 6, os que tiña ata agora. Esta mudanza suma un "non" seguro á investidura de Pedro Sánchez.
O Parlamento Europeo estudará se envía unha delegación á mina de Touro para investigar as denuncias sobre contaminación. A Comisión de Peticións da Eurocámara decide manter aberta a petición da rede Contraminacción e solicitar información á Xunta e ao Goberno central logo dunha visita a Bruxelas de activistas de diferentes plataformas contra a megaminería.
O PSdeG promove como senador por designación do Parlamento galego a Xoaquín Fernández Leiceaga, que coordinará o programa electoral do partido para as eleccións galegas. "O meu empeño fundamental vai ser seguir contribuíndo ao cambio
político en Galicia", di o tamén presidente dos socialistas galegos, ata agora voceiro parlamentario. Tras as novas xerais, a Cámara galega ten que volver designar tres postos no Senado; dous corresponden ao PP e un, ao PSdeG por volver ser segunda forza do lexislativo.
