Movementos sociais

O 22-M organiza novas mobilizacións en todo o Estado. En Galicia a proposta son seis marchas que conflúan na Praza do Obradoiro, de novo para reclamar "pan, traballo e teito".

A muller asasinada pola súa parella este luns en Barro é a sexta vítima mortal da violencia de xénero en Galicia no que vai de ano. A Marcha Mundial das Mulleres e outros colectivos chaman a rexeitar as agresións de xénero na rúa con mobilizacións convocadas para a tarde deste martes.

Un estudo recente asegura que case a metade das nais percibe riscos para a súa carreira profesional, algo que lle acontece só a un de cada seis pais. A diferenza de salarios a favor dos varóns fai que sexan elas as que adoiten renunciar á xornada completa ou abandonen o seu emprego.

AGE alerta que o procedemento omite que a Cova de Eirós é BIC en aplicación da Lei e partes dos terreos e solos de protección patrimonial, o que "converte a licenza en nula de pleno dereito". Exixe á Xunta que inste o Concello a anulación inmediata do permiso.

A Asociación de Usuarios do Servizo de Oncoloxía salienta a "diferenza de trato" entre o "despregamento de medios" do Estado para atender o misioneiro enfermo de ébola e a negativa a subministrar tratamentos contra o cancro desatendendo o criterio médico e priorizando os motivos económicos. Falamos coa súa voceira, Montse Recalde.

O Comité Cidadán de Emerxencia chama á solidariedade e pide colaboración para xuntar os 2.500 euros que precisa abonar o ex patrón maior da confraría de Ferrol, condenado por participar no bloqueo do Galicia Spirit con destino a Reganosa en 2007.

Un compoñente das brigadas de reforzo (BRIF) do Ministerio de Agricultura é suspendido con catro días de emprego e soldo por amosar unha imaxe do lume en internet. O creador da conta de Twitter 'Diario de un bombero' acusa a empresa semipública de "censura" e advirte de que a difusión de fotografías vai continuar.

A cementeira enfróntase xa a dous recursos de resposición da licenza municipal, unha denuncia ante a Policía Autonómica e as numerosas críticas ás supostas irregularidades que comete nunha explotación que dana un río, o Camiño de Santiago e o xacemento da Cova de Eirós.

Membros de diferentes movementos sociais e políticos da cidade lanzan un proceso que segue o ronsel da Marea Atlántica ou de Guanyem e que procura a confluencia nunha candidatura cidadá para as eleccións municipais de 2015.