A pasada semana a Xunta fixo pública a Declaración de Impacto Ambiental (DIA) coa que, agregando unha serie de condicións sobre o proxecto inicial, deu luz verde neste ámbito aos plans de Altri e Greenalia para erguer a súa fábrica de celulosa e fibras téxtiles en Palas de Rei. O documento, publicado no Diario Oficial de Galicia o 14 de marzo, fora asinado o día 5 do mesmo mes pola directora xeral de Calidade Ambiental e Sostibilidade da Xunta, María José Echevarría, e o subdirector xeral de Avaliación Ambiental, Alejandro Carrera.
O feito de que figurasen dúas sinaturas nesa DIA foi observado como un elemento relativamente rechamante en fontes coñecedoras deste tipo de procedementos. Fundamentalmente, polo feito de que a directora xeral, Echevarría, adoptou dende a súa chegada ao cargo a dinámica xeral de asinar en solitario estas declaracións de impacto ambiental asumindo así de facto, argumentara, a responsabilidade sobre o labor dos demais cargos e técnicos xerarquicamente subordinados ao seu posto.
Pero na DIA de Altri figurou tamén a sinatura do subdirector, como acontecera en períodos anteriores á chegada da actual directora xeral. O nome de Carrera, inédito na esfera pública e no tirapuxa partidario -como acontece coa práctica totalidade dos subdirectores xerais e cargos de rango semellante- volveu aos ruxerruxes da política galega este pasado martes. Fíxoo a conta da publicación no DOG dunha orde ditada o pasado 10 de marzo pola conselleira de Medio Ambiente, Ángeles Vázquez, na que convoca a provisión, polo sistema de libre designación, do cargo de subdirección xeral de Avaliación Ambiental.
Medio Ambiente encadra no procedemento "habitual" que o subdirector de Avaliación Ambiental pase de exercer o posto en comisión de servizos a facelo "con carácter definitivo" pola vía da libre designación, o que propiciará que consolide o nivel máis alto na carreira funcionarial
A preguntas de Praza.gal, a Consellería confirma que Alejandro Carrera estaba a exercer este posto en comisión de servizos, unha figura legal que permite que o persoal funcionario cubra temporalmente -ata dous anos- un posto que non é o seu "en caso de urxente e inaprazable necesidade" se cumpre certas condicións fixadas pola Administración, que a efectos prácticos cobre a praza discrecionalmente. É un procedemento "habitual", agrega unha fonte oficial do departamento, que as vacantes en subdireccións xerais sexan cubertas inicialmente por esta vía para, posteriormente, facelo "en réxime de libre designación".
Esta vía, a da libre designación, é formalmente unha "convocatoria pública" na que a Administración ten a facultade de aplicar a "apreciación discrecional" da "idoneidade dos candidatos" e elixir o persoal funcionario que considere oportuno entre todas as persoas que se presenten. Neste caso concreto, Alejandro Carrera ten a obriga de participar no proceso para non perder a comisión de servizo e se gaña a libre designación, ficará nel "con carácter definitivo" ata que haxa unha decisión política en sentido contrario. Cando isto suceda, manterá o rango de funcionario de nivel 30 por exercer máis de dous anos un posto dese rango, o máximo posible na Administración e seis por riba do que obtivo ao gañar en 2022 a súa praza definitiva no corpo superior da Administración Xeral como técnico instrutor en formación ocupacional en Ourense.
No seo da actual oposición parlamentaria interprétase esta consolidación en clave de "premio" a Alejandro Carrera polo seu papel na declaración de impacto ambiental de Altri, toda vez que se dá por absolutamente seguro que a libre designación será gañada por el. A Consellería, pola súa banda, encadra este procedemento na normalidade á hora de prover un posto coma este, sen outras implicacións a respecto de Carrera López, que anteriormente exercera labores como a xefatura do Departamento de Xestión Administrativa da Axencia Galega da Industria Forestal.
