A Xunta recorrerá a condena pola contaminación das macrogranxas na auga da Limia

A conselleira de Medio Ambiente, visitando unha piscifactoría no Carballiño este 12 de xullo, e fragmentos da sentenza do TSXG sobre a contaminación das augas na Limia CC-BY-SA Foto: Xunta | Montaxe: Praza.gal

Hemeroteca

O TSXG sentenciou que o Goberno galego incumpriu as súas obrigas ambientais ao "permitir un incremento excesivo de macrogranxas" na comarca ata ser "máis de 300" sen "trasladar o risco medioambiental ás empresas destinatarias do beneficio"

A histórica sentenza coa que o Tribunal Superior vén de condenar os gobernos de Galicia e España pola súa "inactividade" ante a contaminación das augas que provocan as macrogranxas na Limia terá que pasar o filtro do Tribunal Supremo. Así sucederá porque a Xunta xa ten decidido recorrer un ditame que a fai directamente responsable das consecuencias nos "dereitos fundamentais"  da veciñanza das chegada de verteduras masivas de esterco e outros residuos ao encoro das Conchas e a súa contorna.

Foi a conselleira de Medio Ambiente, Ángeles Vázquez, quen este sábado confirmou á prensa durante unha visita a unha piscifactoría no Carballiño esa intención de formular recurso porque "respecta", o que "non quere dicir que esteamos de acordo" cunha sentenza na que o seu departamento é dos máis sinalados. "A Xunta a través da Consellería correspondente", di o ditame, infrinxiu "preceptos que permiten salvagardar a calidade das augas subterráneas", "normas adicionais sobre protección do medio ambiente" e tamén "en materia de sanidade".

Fragmentos da sentenza sobre a contaminación das augas da Limia referidos á responsabilidade da Xunta e do Estado CC-BY-NC-SA Praza.gal

Fíxoo, segundo a Sala do Contencioso-Administrativo do alto tribunal galego, ao "permitir un incremento excesivo nunha comarca como A Limia de macrogranxas", ata ser "máis de 300", "sen trasladar o risco medioambiental ás empresas destinatarias do beneficio". "Este feito", sinalan os maxistrados, "acrecéntase coa ineficaz xestión dos refugallos que remataban en lugares non controlados" e "sen que se controlasen quimicamente" malia a "posible presenza de antibióticos" ou outros "derivados de medicamentos" ata "provocar unha saturación do medio que o terreo era incapaz de asumir".

A conselleira Ángeles Vázquez pon o foco nas competencias da Confederación Miño-Sil, condenada na mesma sentenza, e critica que o tribunal sinale o exceso de granxas, cuxa "importante saturación" admitiu o seu propio departamento

"Esta situación -destaca a sentenza- está presente dende o ano 2011" e "trasládase sen descanso do terreo ata o presente", o que "provoca un estado da masa de auga subterránea moi deficiente e contaminada por exceso de nitratos". Esas mesmas augas "acaban no río" e "por efectos do encoro" das Conchas "aséntase, provocando os "bloom de cianobacterias", isto é, episodios críticos de contaminación.

Fronte a este catálogo de acusacións, que a sentenza formula antes de relatar as que corresponden ao Estado a través da Confederación Hidrográfica Miño-Sil (á que reprocha, entre outros aspectos, "inacción ante o constatable empeoramento da calidade das augas" e non actuar "contra a proliferación das autorizacións das macrogranxas), Vázquez pon o foco nas tarefas pendentes do Goberno de España na zona. Porque a competencia, exemplifica, para declarar A Limia como zona vulnerable por nitratos é estatal.

Encoro das Conchas, o pasado xuño © Víctor Luengo/Amigas da Terra/ClientEarth

A respecto da proliferación de macrogranxas e a moratoria que o Tribunal impón, a conselleira limítase a afirmar que a Xunta as autoriza se ten "todos os informes sectoriais correspondentes" e que os "relativos á auga" parten da CHMS, que "endexamais fixo un informe desfavorable". Como informou Praza.gal, a propia Consellería de Medio Ambiente admitiu en 2024 unha admitiu unha "importante saturación" de granxas na Limia "que poden afectar á calidade das augas". Fíxoo na documentación para autorizar unha nova para acoller ata 614 xatos en Trasmiras.

Despece

  • Interesouche esta información? Faite de Praza.gal

    Hai informacións que só podemos contar da man das socias e socios. Contámolas contigo. Dende moi pouco, a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas. Podes optar por unha cota mensual ou faceres unha achega puntual, agora tamén con tarxeta ou a través do Bizum.

    Lembra, ademais, que ata o 80% da túa achega vénche de volta na declaración da renda. Así, por exemplo, unha cota de 10 euros ao mes pódeche quedar nun gasto real de 2 euros ao mes.

    Xa es socia ou socio de Praza?

    Faríanos moito ben que, se podes, pensases en aumentar a túa achega. Como vos contamos o pasado abril, a marcha das contas da Fundación Praza Pública -a nosa editora- no pasado ano e a nosa actual estrutura fan imprescindible incrementarmos os ingresos neste 2025 para evitar que o que hoxe é unha situación económica axustada derive, no medio prazo, noutra de indesexables dificultades e consecuencias.

    Podes tramitar a túa nova cota como unha alta nova nesta ligazón. Simplemente,  emprega o mesmo correo electrónico e datos persoais que co teu perfil actual e o sistema substituirao automaticamente.Grazas!

    CC-BY-NC-SA Praza.gal

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza