O Supremo conclúe, "sen lugar a ningunha dúbida", que o ex-presidente da Deputación de Ourense e actual senador circulaba a máis de 200 por hora
"Sen lugar a ningunha dúbida", José Manuel Baltar cometeu un delito contra a seguridade viaria aos mandos dun coche oficial da Deputación de Ourense cando aínda era presidente da institución. A Sala do Penal do Tribunal Supremo vén de condenar o que fora presidente da institución ourensá durante máis dunha década por circular a "máis de 200 quilómetros por hora" á altura de Asturianos (Zamora) o 23 de abril de 2023 por un tramo da autovía A-52 na que rexe a limitación xeral de 120.
O actual senador do PP por designación do Parlamento de Galicia, condición pola cal o caso pasou dende o xulgado ordinario competente (o de Pobra de Seabra) ao Supremo, afrontou neste proceso unha petición do rango mínimo posible de condena tanto de multa como de retirada do permiso de conducir por parte da Fiscalía, única acusación. É por iso que o Tribunal lle impón 1.800 euros de sanción e lle prohibe volver guiar un vehículo a motor durante un ano e un día.
Desa cantidade de multa a Baltar descóntanlle o que xa pagou en vía administrativa, 300 euros. Ese pagamento, precisamente, foi un dos argumentos de quen tamén foi líder provincial do PP ourensán ata 2023, esgrimindo que non podería ser condenado polo penal pola mesma conduta que xa lle implicara unha sanción administrativa no momento.
Baltar tentou evitar a condena penal alegando que xa fora sancionado pola vía civil. O tribunal acredita que os axentes que o pararon optaron "pola vía máis respectuosa" cos seus dereitos ao non poder comprobar no momento a marxe de erro do radar, pero que esas "dúbidas iniciais" non poden "bloquear unha verdade incontestable"
Pero os maxistrados enfatizan que os gardas civís que o pararon tras detectalo no radar a 215 por hora "actuaron con dilixencia". Non dispuñan da documentación para comprobar a marxe de erro do radar e, ao cadrar os feitos nun domingo que ademais era festivo na comunidade autónoma de Castilla y León, non podían consultalo coa central. Por iso "optaron pola vía máis respectuosa cos dereitos do condutor", pero "cando despexaron tal dúbida", "só dous días máis tarde", confeccionaron "un completo atestado con todas as circunstancias fácticas" e remitírono ao xulgado. E, dende ese momento, a vía penal obrigou a suspender a administrativa.
"As dúbidas iniciais dos axentes, que non contaban co preciso marxe de erro", abonda a sentenza, "non poden servir para bloquear o que é unha verdade incontestable", que é que o coche oficial conducido por Baltar foi captado polo radar a 215 quilómetros por hora. Dado que a marxe de erro do aparello -instalado nun trípode e, polo tanto, equivalente a efectos legais a un radar fixo- era dun 5%, "o acusado circulaba, cando menos, a 204 quilómetros por hora" cando non podía pasar de 120.
Estes feitos probados, conclúen, constitúen un delito tipificado no artigo 379.1 do Código Penal, toda vez que Baltar superaba en máis de 80 quilómetros por hora a velocidade máxima permitida. Con esta sentenza contra a que non cabe recurso finaliza o percorrido xudicial dun caso que acelerou a fin do mandato da familia Baltar á fronte da Deputación e do PP de Ourense e durante o cal o actual senador optou por diversas estratexias, dende cuestionar o proceder dos axentes a atribuír a acusación a unha "campaña" contra el.
Rueda non lle pedirá que deixe o cargo, o BNG volverá esixir a dimisión
O presidente desbota "pedirlle que deixe o cargo de senador" e relativiza a condena despois "do que se dixo en que podía consistir". A Fiscalía, acredita o Supremo, pediu "pena de multa mínima e mínima tamén a privación do dereito a conducir
Pouco despois de que o Supremo fixese pública a condena a Baltar, o presidente da Xunta e do PPdeG desbotou consecuencias políticas inmediatas para o ourensán. Preguntado ao respecto tras o Consello da Xunta, Alfonso Rueda confirmou que non ten "intención de pedirlle que deixe o cargo de senador" en representación do Parlamento galego, ao que accedeu por decisión do PPdeG no verán de 2023, cando tras as eleccións xerais quedaron vacantes os escanos de Alberto Núñez Feijóo e Miguel Tellado, acabados de elixir deputados no Congreso.
Alén desa ratificación sobre a permanencia de Baltar no escano, Rueda relativiza a condena que, evidencia, Baltar "ten que cumprir" como "calquera persoa que se somete á acción da xustiza". Ao seu xuízo, cómpre "recordar todo o que se comentou sobre este tema, o que se dixo en que podían consistir as penas e o que é a sentenza". Ademais da retirada do carné e as multas, o Código Penal contempla para estes delitos penas de prisión de ata seis meses ou ata tres meses de traballos en beneficio da comunidade pero, como acredita a sentenza, a Fiscalía optou por pedir a "pena de multa mínima e mínima tamén a privación do dereito a conducir", polo que "procede impoñer ambas sancións penais sen maior motivación".
O BNG, pola súa banda, avanza que volverá impulsar no Parlamento a reprobación de Baltar tras unha "condena máis que esperada". "Esta persoa mentiu sobre a velocidade e aínda hoxe oculta detalles sobre o uso privado dun recurso público" como é o coche oficial, subliña a deputada Noa Presas, para quen é "unha vergoña" que "alguén con este historial e esta pouca exemplaridade" siga "ostentando o cargo de senador que lle deu o PP para tapar os seus problemas internos". Son motivos máis que dabondo, resalta a parlamentaria ourensá, para esixirlle a dimisión.
