O secretario xeral do PSdeG celebrou este venres o arquivo do proxecto de Altri constatado pola Xunta como unha "vitoria para Galicia" fronte a un "proxecto que o noso país nin quería nin necesitaba". E que ten a súa orixe, aplaude José Ramón Gómez Besteiro, nun "triplo non razoado" por parte do Goberno de España.
"Se dan marcha atrás é porque as negativas do Goberno socialista lle puxeron freo a este proxecto por non cumprir os estándares económicos, sociais nin medioambientais", sinala Besteiro en referencia ao feito de que Altri non puidese acceder aos fondos europeos de descarbonización e tampouco ás "axudas extraordinarias, por non ser un proxecto innovador tecnolóxica nin medioambientalmente". E finalmente, tampouco "entrar na planificación eléctrica" que si inclúe outras industrias en Galicia.
O secretario xeral do PSdeG coida que agora cómpre aínda máis "transparencia inmediata" sobre o pacto secreto da Xunta coa compañía para aclarar "se aos galegos e galegas lles vai custar cartos esta aposta falida"
Todos estes elementos, di, eran os que apuntaba a dirección do PSdeG cando "defendemos que tiña que cumprir parámetros económicos, sociais e medioambientais". E foi tras esa "análise", mantén, cando concluíron que Galicia "non merecía" a instalación desta factoría en Palas de Rei.
"Foi o Goberno socialista quen paralizou" o que o líder do PSdeG sintetiza como "o proxecto industrial de Alfonso Rueda", unha "operación política" sobre a que agora, advirte, cómpre aínda máis "transparencia inmediata", a comezar por revelar" que compromisos concretos adquiriu" a Xunta "no pacto secreto" con Altri. É necesario aclarar, incide, "que incentivos, que garantías se chegou a ofrecer" e nese sentido, "se aos galegos e galegas lles vai custar cartos esta aposta falida".
