Lanzada a fronte de concellos para alertar da "situación límite" do Sergas en Pontevedra, que a Xunta reduce a un "tema partidista"

Xuntanza de concellos para abordar a situación sanitaria da área de Pontevedra, este 18 de xaneiro en instalacións municipais pontevedresas © Concello de Pontevedra

Hemeroteca

Representantes de case unha vintena de municipios da contorna pontevedresa veñen de tecer unha fronte común para denunciaren a "situación límite" do Servizo Galego de Saúde nese distrito sanitario, parte da área de Pontevedra e O Salnés. Encabezados polos alcaldes de Pontevedra (BNG), Ponte Caldelas (PSdeG), Caldas de Reis (PSdeG), Vilaboa (PSdeG), Cuntis (PSdeG), Poio (BNG), Bueu (BNG) e Barro (BNG), aseguran xuntarse para advertir de que "a saúde das persoas" está "en grave risco", mentres que a Xunta coida que o fan por un "tema partidista" en vésperas das eleccións municipais.

Alcaldes e edís de PSdeG, BNG, EU e mesmo C's acudiron á xuntanza, á que declinou asistir o PP

Na xuntanza, co pontevedrés Miguel Anxo Fernández Lores como anfitrión participaron ata trinta representantes municipais de gobernos e oposicións da zona. Á mesa sentaron membros do PSdeG, do BNG, de EU, de forzas independentes e de Ciudadanos. Todas as forzas agás o PP, que declinou acudir. Dela saíu un manifesto que traza un bosquexo da situación: "Non hai persoal médico para cubrir os nove PAC's, o persoal de enfermaría está sometido a un estrés sobrehumano" e "mesmo se fan recaer labores sanitarios no persoal de servizos xerais".

Hospital de Montecelo, en Pontevedra © Concello de Pontevedra

Neste escenario, advirten, "a veciñanza dos vinte concellos que conforman o distrito vémonos na obriga de percorrer PAC's e centros de saúde cada vez que precisamos atención médica" porque non hai "ningún que teña un funcionamento normal", o cal "conduce a un colapso das urxencias hospitalarias". "Magoa ver as persoas doentes, moitas veces de avanzada idade, nos corredores e salas de agarda durante horas interminábeis" e tamén, describen, "as crianzas nos colos dos pais e nais até por fóra das urxencias pediátricas do Hospital Provincial".

Na vintena de municipios do distrito sanitario pontevedrés, advirten, ningún centro de saúde ou PAC "ten funcionamento normal" por falta de persoal, o que "conduce ao colapso das urxencias hospitalarias". O conselleiro Comesaña, que convocou os concellos para a vindeira semana, lamenta que a protesta non cite o Goberno de España

En apenas vinte días de 2023, advirten, xa "faltou asistencia médica" en oito centros da contorna por mor dunha "carencia de profesionais" que "impide ás persoas que traballan na sanidade pública faceren o seu traballo como saben". "A atención sanitaria pública á poboación non está garantida cuns mínimos de calidade", sintetizan, "un feito gravísimo que precisa dunha actuación urxente e decidida da Xunta" que, lembran, ten as competencias "exclusivas" na materia.

Concretamente, reclaman do Goberno galego unha "mellora das condicións laborais do persoal sanitario e a mellora da rede de centros da nosa área", medidas para "cubrir as prazas vacantes, incluíndo as prazas MIR" e "resolver xa a situación das urxencias hospitalarias, especialmente as pediátricas". "Sabemos que faltan médicos, sabemos como a xente está a peregrinar entre municipios buscando traballadores sanitarios, centros nos que poidan ser atendidos. Temos a obriga de esixir as medidas pertinentes para que isto non pase. A situación non está mellorando, non mellorou despois da pandemia, e a xente ten que ser atendida como merece", resume Lores, médico de profesión.

O conselleiro de Sanidade, Julio García Comesaña, nun acto no Hospital Provincial de Pontevedra este 18 de xaneiro CC-BY-SA Xunta

A xuntanza desenvolveuse este pasado mércores, xornada na que o conselleiro de Sanidade visitaba Pontevedra e na que, preguntado ao respecto, reducía a fronte de concellos a "un tema partidista, meramente político". Neste sentido, Julio García Comesaña censurou que o manifesto non cite o Ministerio de Sanidade, ao que o Goberno galego culpa da carencia de prazas en medicina de familia. O propio Comesaña citou para a vindeira semana en Pontevedra -o xoves, día 26- a concellos da comarca para abordar a situación sanitaria. A fronte municipal que vén de ser constituída demanda que ao encontro acuda o presidente da Xunta, Alfonso Rueda.

Despece

  • Feijóo di "querer gobernar" porque "cando a sanidade non funciona hai listas de espera" e iso é "a maior privatización"

    Feijóo equipara as listas de espera sanitarias coa privatización durante un mitin do PP en Cuenca, este 18 de xaneiro CC BY-NC-SA Praza.gal | Imaxe: Sinal realizado PP

    O ex-presidente da Xunta e actual líder estatal do PP, Alberto Núñez Feijóo, aproveitou este 18 de xaneiro un acto de partido para abordar a cuestión das protestas de persoal sanitario e de persoas usuarias dos servizos públicos de saúde que, como en Galicia, tamén se están a rexistrar noutros puntos do Estado. Nun intre do mitin, quen fora titular do Goberno galego e antes, xerente do Sergas, afirmou que o PP "quere gobernar" porque "a sanidade, cando non funciona, o que fai é lista de espera". "E a lista de espera é a maior privatización da sanidade", afirmou.

    Os últimos datos de espera do Sergas situábanse nunha media de 75 días para operacións de 55 para consultas especializadas. En Primaria, o propio Sergas admite que en 2023 ata o 10% das citas de atención primaria tarden máis de 4 días

    Que existan demoras sanitarias, abondou Feijóo, é tanto como "non atender á xente" e "non atender á xente é a privatización real da Sanidade", dixo en Castilla-La Mancha, onde goberna o PSOE. Horas despois, o PP divulgou nas redes sociais unha listaxe de "propostas en sanidade" como "contratar os residentes que rematan este ano en medicina de familia para que traballen dende a en Atención Primaria" , atrasar xubilacións ou "promover o retorno dos médicos que desenvolvesen a súa carreira profesional noutros países".

    As declaracións de Feijóo foron respondidas dende a hilaridade nas redes sociais por usuarias anónimas e tamén dende perfís ligados ás forzas políticas da actual oposición galega xa que, ao seu xuízo, contradín o labor de Feijóo como presidente da Xunta durante máis dunha década. Os últimos datos de listas de espera coñecidos para Galicia están nunha media de 75 días para operacións cirúrxicas (vinte máis que antes da pandemia da COVID) e de 54,8 días para consultas externas. En Atención Primaria, o propio Sergas admite que en 2023 ata o 10% das citas de atención primaria tarden máis de 4 días.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza