A Sociedade de Medicina de Urxencias alerta dun "colapso" xeral con "récords" na Coruña, Pontevedra e Vigo

Pacientes atendidos en urxencias, nun corredor do Clínico de Santiago, nunha imaxe divulgada pola asociación de pacientes o pasado 10 de xaneiro CC-BY-SA Asociación de Pacientes e Usuarios do CHUS

Hemeroteca

A Sociedad Española de Medicina de Urgencias y Emergencias (SEMES), que agrupa uns 25.000 profesionais da sanidade en todo o Estado, exprésase xa en termos de "insostible" situación de "colapso". Unha vez superados os momentos críticos pola COVID, as semanas de 'picos' de virus respiratorios -o propio coronavirus, pero tamén a gripe ou o sincitial na infancia, entre outros- contribúen a empeorar unha situación na que, aseguran, "estes servizos atenden un 30% máis de pacientes" que nas mesmas datas de 2019 na media estatal, un incremento que vai máis alá, afirman, en varios hospitais galegos.

A entidade que preside o doutor Tato Vázquez Lima, coordinador de Urxencias do Hospital do Salnés, volve poñer o foco en dúas causas fundamentais para explicar as cifras disparadas de pacientes nestes servizos. Por unha banda, "a situación da Atención Primaria". Por outra, "a deficitaria drenaxe, paso de pacientes a hospitalización". E, agravadas polo feito de estar o persoal "farto da falta de recoñecemento da súa especialidade médica".

O doutor Tato Vázquez Lima, nunha imaxe de arquivo CC-BY-SA Xunta

Todo isto, resaltan, deriva en "problemas serios" no "conxunto" dos hospitais, con "escenas que, non por ser repetidas" deixan de ser "intolerables". "Numerosos pacientes que xa foron atendidos" en Urxencias "esperan ata tres días nos corredores, converténdoos en almacéns que dificultan enormemente a actividade" e "castigan a dignidade e intimidade" das persoas doentes, algo que -lembran- xa advertiron as diferentes valedorías do pobo.

SEMES sinala un incremento medio de entre o 15% e o 20% de pacientes atendidos nas urxencias hospitalarias galegas a respecto de hai un ano, pero con picos superiores ao 40% en hospitais como o CHUAC coruñés. "O sistema estase dinamitando", afirma o seu presidente, tamén coordinador de Urxencias no Salnés

SEMES lanza esta alerta a través dun comunicado que sinala exemplos concretos en diferentes puntos do Estado. No caso galego, a advertencia vén de boca de José Manuel Fandiño, presidente de SEMES Galicia, quen resalta que "esta tensa situación se mantivo durante todo 2022" e "empeora" no inicio de 2023. "Seguimos batendo récords" cun "aumento global" de entre o 15% e o 20% a respecto de 2022. Pero hai centros, advirte, que chegan a duplicar ese dato medio.

"Sen ir máis lonxe, o luns 9 de xaneiro no Hospital Universitario da Coruña fomos testemuñas dun aumento do 45% a respecto dos datos mensuais de xaneiro de 2022". Ese día, afirma, no CHUAC había "70 pacientes sen cama". Nun sentido semellante pronunciáranse en días pasados sindicatos como a CIG-Saúde sobre o mesmo hospital. O "problema principal" é a "falta de drenaxe" cara ás camas de hospitalización, recalca, para a continuación sinalar que "en cidades como Pontevedra e Vigo os picos son tamén de entre o 40 e o 45% a respecto de 2022".

Acceso á área de Urxencias do Clínico de Santiago CC-BY-SA Xunta

"As cargas asistenciais, o esgotamento e os problemas noutros niveis asistenciais non fan máis que poñer en risco a rede de seguridade do sistema de saúde, as urxencias", e por iso SEME lanza unha nova apelación tanto ás comunidades autónomas, titulares das competencias, como ao Goberno de España. A ambos niveis gobernamentais diríxese Vázquez Lima para reiterar a petición da "necesidade inmediata da creación da especialidade de Medicina de Urxencias e Emerxencias mediante unha especialidade primaria". "Non se pode dicir -conclúe- que non levamos tempo advertíndoo: o noso Sistema Nacional de Saúde estase dinamitando".

"Os peches e as listas de espera obrigan a acudir a Urxencias"

A Xunta volve sinalar o Estado; a Asociación Galega para a Defensa da Sanidade Pública reitera que o Goberno galego "ten transferidas todas as competencias" na materia e lembra os recortes da pasada década

Neste contexto, e mentres colectivos como a Asociación de Pacientes e Usuarios do CHUS relatan casos concretos coma o dun paciente "que permaneceu 3 horas e media nos corredores de acceso" das Urxencias do Clínico compostelán "e case 48 horas nun box", a Asociación Galega para a Defensa da Sanidade Pública -integrante da plataforma SOS Sanidade Pública- saía este xoves ao paso das reiteradas declaracións nas que a Xunta sitúa esencialmente no Estado a responsabilidade da situación. Cómpre volver lembrar, salientan, que "as comunidades autónomas teñen transferidas todas as competencias para o financiamento, creación e organización e centros de saúde e hospitais".

Defende o colectivo que "a falta de persoal médico é atribuíble aos recortes para reducir gasto público" durante a pasada década, "que supuxeron a amortización de prazas por xubilación e precariedade laboral" que "favorece que o persoal formado en Galicia polo sistema MIR" para os centros de saúde "fuxa aos hospitais, á privada ou a outros países". Neste contexto, "os peches de centros de saúde, de servizos de pediatría extrahospitalaria e de PAC, as listas de espera que superan a semana ou a hexemonía da consulta telefónica obriga a poboación enferma a acudir ás urxencias hospitalarias como último recurso para ser atendida", conclúen.

Despece

  • A Xunta di prever recuperar este ano a espera cirúrxica previa á pandemia, uns 55 días fronte á media actual de 75

    Reunión do Consello da Xunta, este 12 de xaneiro en San Caetano CC-BY-SA David Cabezón / Xunta

    A Xunta di estar en condicións de recuperar en 2023 a espera cirúrxica media no Sergas rexistrada xusto antes do estourido da pandemia do coronavirus, a finais de 2019, cando o dato oficial da Consellería de Sanidade se situara nunha media de 54,5 días. Isto implicaría rebaixar nuns vinte días a espera media actual, que a finais do primeiro semestre de 2022 -último dato dispoñible, adiantado o pasado setembro por Praza.gal- estaba en 75,3.

    Este é un dos obxectivos marcados polo presidente da Xunta, Alfonso Rueda, tras tratar no Consello do seu Goberno reunido este xoves un Informe para a intensificación da actividade asistencial e para a redución das
    listas de espera. Trátase, di o Executivo, dun plan co que o Sergas vai "incrementar a actividade extraordinaria" co obxectivo de "non só chegar a eses datos" de 2019, "senón de melloralos".

    Case 43.000 pacientes crónicos ou pluripatolóxicos non pasaron revisións "nos últimos seis meses", admite o Goberno galego, que di contemplar atendelos cun novo plan de consultas durante este 2023

    Indica a Xunta que prevé atender 20.665 operacións cirúrxicas a través dos "programas tradicionais de autoconcertación" (actividade extraordinaria en quenda de tarde), que tamén abordarían algo máis de 124.000 consultas e 54.440 probas. Asemade, indica, aplicaranse fórmulas como poñer os quirófanos dos hospitais comarcais "á disposición de calquera profesional da área sanitaria" nesa mesma quenda "extraordinaria" para realizar unhas 4.250 operacións.

    Ademais, di a Xunta, está contemplado facer unhas 300 operacións de oftalmoloxía no hospital de Pontevedra, de cirurxía torácica no Álvaro Cunqueiro de Vigo e de cirurxía pediátrica no CHUAC coruñés a pacientes doutras áreas sanitarias. Os seus hospitais de referencia "ofrecerán a posibilidade" de intervención nesoutros centros "en menos de dous meses" e "no caso de que o paciente non acepte", seguirá esperando.

    Os detalles avanzados pola Xunta a respecto deste plan indican tamén a previsión de pasar consulta "a un total de 42.828 pacientes" con "patoloxías crónicas e/ou pluripatolóxicas" que, admite, "non foron revisados nos últimos seis meses". Estas citas consistirán nunha "primeira consulta" de enfermaría que incluirá electrocardiograma, analítica ou retinografía para, a continuación, "realizar a consulta médica" e programar "unha nova cita de seguimento.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza