Aínda que resta algo máis de medio ano para a celebración das eleccións municipais do 28 de maio de 2023, a Oficina do Censo Electoral (OCE) está a realizar xa diversos trámites previos a este comicios. Dende 2011, nas eleccións municipais non poden participar as persoas inscritas no censo de residentes ausentes (CERA), pero si hai outros votantes que poden participar se o solicitan. Trátase de residentes que proceden doutros Estados da Unión Europea.

Como lembra a Oficina do Censo, a cidadanía do resto da UE que resida en territorio do Estado español e teña 18 ou máis anos no día das eleccións municipais pode votar no seu concello. Pero para poder votar, "deben manifestar previamente a súa vontade de exercer ese dereito". Se xa o fixeron antes de anteriores comicios, non teñen que repetir o trámite. Pero a quen aínda non o fixo, a OCE vaille lembrar esa posibilidade en datas vindeiras.

"Para facilitar este trámite, a OCE vai enviar por correo postal unha comunicación" a 451.397 persoas procedentes da UE rexistradas no censo ás que "non se dirixira en anteriores eleccións" e que "non manifestaron anteriormente a súa vontade de exercer o dereito ao voto nas eleccións muncipais. No caso galego, están nesta situación case dez mil persoas, mentres que unhas 7.800 xa indicaran que queren votar.

O prazo para que a cidadanía procedente doutros países da UE manifeste que quere votar nas municipais finaliza o 30 de xaneiro e desta volta pódeno facer tamén a través de internet

Nesa carta, ademais de lles lembrar a posibilidade de participar nos comicios locais, estas persoas van recibir unha clave "que poderán usar para manifestar de forma telemática a intención de votar". Trátase, explican, dun novo procedemento que poderá ser utilizado ata o vindeiro 30 de xaneiro.

Así, estas persoas "poderán realizar a súa manifestación de vontade por internet" a través da sede electrónica do INE usando esa clave. Se o desexan, tamén poden facelo por vía postal, enchendo un formulario anexo á carta e remitíndoo á delegación provincial do Censo Electoral.

No caso da cidadanía do resto da UE que non está inscrita no Padrón municipal, o INE lémbralle que o primeiro paso para poder votar nas municipais é o empadroamento. No propio Concello, agregan, poden "realizar a manifestación de vontade" de votar. Segundo os datos máis recentes do Padrón, en Galicia residen algo máis de 33.000 persoas procedentes doutros Estados da UE.