"Venceu a dignidade". A portavoz nacional do BNG ve no arquivo do proxecto de Altri confirmado este venres pola Xunta como unha "mostra máis da capacidade que ten o pobo galego para defenderse fronte a proxectos que supuñan unha ameaza para o noso futuro".
"É un gran día para Galiza" e "un gran triunfo da cidadanía", a comezar pola das comarcas máis afectadas polo proxecto, sostén Ana Pontón, que sinala como parte da vitoria os "milleiros de galegas e galegos que nos mobilizamos en contra da bomba ambiental de Altri". "Sen rendernos nunca e desmontando todas e cada unha das mentiras e das falacias do PP", salienta.
"Venceu a dignidade", sostén a líder do BNG, que no vindeiro pleno do Parlamento cuestionará a Rueda sobre o contido do pacto secreto da Xunta coa compañía portuguesa
O acontecido, coida a líder soberanista, implica tamén a "derrota dun goberno do PP que defendía o espolio dos nosos recursos, a contaminación do noso territorio por riba das persoas" e que "quería poñer os intereses de Altri por riba da xente do medio rural e do mar". Implica, incide, a derrota "dun PP que só ofrece o franquismo industrial das macrocelulosas e que non ten máis alternativa industrial para Galiza que recoller proxectos que ninguén quere.
O arquivo do expediente de Altri chega en vésperas de que, no vindeiro pleno do Parlamento, Pontón vaia cuestionar o presidente da Xunta sobre o contido do pacto secreto ao que o Goberno galego chegou con Altri a través da agora disolvida sociedade Impulsa Galicia. Paralelamente, o Bloque está a tentar conseguir esa documentación a través dunha petición formal ante Tribunal Superior de Xustiza de Galicia que xa foi admitida a trámite.
