O BNG promove sumar 15 millóns ás contas de Cultura para 2026: 10 para "internacionalización" abrindo o Instituto Rosalía de Castro e 5 para un proxecto de impulso ao sector
Un plan que elevaría o orzamento cultural da Xunta ao seu maior nivel en 15 anos pero cunha diferenza substancial ás contas de hai década e media: o lastre das obras da Cidade da Cultura, que hai década e media consumían uns 40 millóns nun ano. É a iniciativa que neste eido está a defender o BNG no trámite dos Orzamentos Xerais do Goberno galego para 2026 e que a súa portavoz nacional formulou este sábado aproveitando a súa visita ao Culturgal.
Propón Ana Pontón achegar aos 110 millóns que a Xunta prevé dedicar á cultura en 2026 -un importe practicamente idéntico ao previsto en 2025- un total de 15 máis. Cinco deles serían para "o Plan Cultura Avanza, para impulsar os sectores culturais" e outros 10, "un plan de internacionalización coa creación do Instituto Rosalía de Castro".
O propósito, di Pontón, é "reforzar o apoio ao unha cultura que, ademais de ser un ben social e un dereito da cidadanía, é un sector económico de primeiro nivel que achega riqueza e postos de traballo". Neste sentido, di, a feira das industrias culturais que esta fin de semana volve acoller Pontevedra revélase como "imprescindible" para "gozar do talento de creadores e creadoras" conformando un "ecosistema cultural propio, rico, creativo e vivo".
Situación de Sargadelos
En materia cultural abordou tamén Pontón o que considera unha "emerxencia": a situación de Sargadelos tras o segundo peche no que vai de ano da factoría de Cervo decidido polo propietario da empresa, Segismundo García, para non cumprir coa Inspección de Traballo. Decisións coma esta, advirte, "teñen consecuencias económicas" pero "ademais afectan a símbolos nacionais de Galiza".
Neste contexto, di, o Bloque volve "pedir ao goberno do PP que actúe" tanto para "garantir a continuidade económica de Sargadelos" como "a custodia do seu legado artístico e cultural". "Hai que manter o emprego e protexer o patrimonio" e iso tamén pasa, advirte, por que "a propiedade cumpra a lei en materia laboral, respectando a integridade e os dereitos do persoal", o cal "inclúe toda a normativa que garanta a saúde laboral".
