A reclamación de chamar CEIP da Almáciga ao actual colexio Apóstolo Santiago partiu da asociación de nais e pais e, tras "dous cursos de reflexión, debate e participación" recibiu apoio unánime do Consello Escolar
O "non" do PP e a abstención dos catro edís non adscritos -antigos integrantes do grupo do PSdeG ata a súa expulsión en 2025- freou este xoves no pleno do Concello compostelán a mudanza de nome do colexio Apóstolo Santiago da capital galega por CEIP da Almáciga, topónimo do barrio no que se atopa. O trámite precisaba saír adiante por maioría absoluta para chegar á Consellería de Educación, á que a lei atribúe a competencia final de decidir se acepta ou non a petición da comunidade educativa.
A reclamación partiu do propio centro, cuxa asociación de pais e nais (ANPA) lembraba esta semana que a proposta foi o "resultado de dous cursos escolares de reflexión, debate e participación". Culminaba o pasado decembro, coa aprobación por unanimidade do Consello Escolar, "seguindo estritamente o procedemento previsto na normativa vixente" e expresando "un consenso transversal" que, reclamaban, debía ser "respectado" no pleno municipal.
A dirección do centro fixo tamén seus estes argumentos ao inicio dun pleno que chegou precedido por unha sonora campaña contra a petición da ANPA en ámbitos da dereita política e mediática. Nesta liña, nos días previos á votación o voceiro do PP local, Borja Verea, ligou a proposta de mudanza a "un perigoso proceso de eliminación de todo o que significa Santiago de Compostela" que atribuíu persoalmente á alcaldesa, Goretti Sanmartín (BNG), descualificada polo conservador como "alcaldesa anti Santiago" dun goberno centrado no "ataque" ao "compostelanismo".
O PP liga a proposta a "un perigoso proceso de eliminación de todo o que significa Santiago de Compostela" que atribúe á alcaldesa, Goretti Sanmartín. Para o goberno local, o voceiro dos populares "falta ao respecto á comunidade educativa, ao barrio e á intelixencia"
Neste contexto, dende o goberno local a súa voceira, Míriam Louzao, lamentou que o que debera ser un trámite "normal" no pleno virase nunha caste de "conspiración de nacionalistas que son o demo" por parte do PP, aínda que isto implique "faltar ao respecto á comunidade educativa, ao barrio e á intelixencia". Verea, pola súa banda, reafirmouse na negativa asegurando que "o nome dunha escola non pertence á comunidade educativa", que ten a "lexitimidade de propoñer" pero non a de "decidir" sobre un asunto con "profunda carga simbólica, sentimental e política".
Encadra Verea a cuestión na necesidade de defender "o nome da nosa cidade". E mentres, acusa, o goberno liderado polo BNG apoia a mudanza porque só se ocupa de "bandeiritas, manifestacións de domingo e colocar os amigos"
A petición da comunidade educativa contou co voto a prol do Bloque e tamén do seu socio de goberno, Compostela Aberta. Asemade, obtivo o "si" dos dous edís do PSdeG, cuxo voceiro, Gumersindo Guinarte, subliñou que á formación lle "serve" tanto o nome actual coma o proposto e xustificou o seu apoio no feito de ser unha "demanda da comunidade educativa que vén de lonxe".
"Tratar de trasladar unha confrontación partidaria ao ámbito escolar é alleo á comunidade educativa e só busca deslexitimar un proceso formal e transparente", lamentaba a ANPA na véspera da votación no pleno, cuxo apoio era imprescindible para trasladar a iniciativa á Xunta, da que dependería a decisión final
Pero a balanza ficou desequilibrada de vez pola abstención dos non adscritos. No seu nome o concelleiro Gonzalo Muíños asegurou estar a "favor da convivencia de ambos nomes", mesmo de renomear o centro como CEIP da Almáciga - Apóstolo Santiago. Ao seu xuízo, o debate político sobre a proposta é a mostra de que non xera "consenso" e ademais, considera, podería sentar "un precedente" para outros centros educativos nun contexto no que, considera, "PP e BNG queren levalo todo ao ideolóxico e á crispación". Un membro da ANPA presente na sesión reprochou persoalmente a Muíños a súa postura.
Na véspera da votación, a través dun comunicado, a ANPA advertía de que "as campañas mediáticas e as interpretacións alarmistas non forman parte do procedemento legal e non poden substituír os órganos democráticos do centro" e, deste xeito, "tratar de trasladar unha confrontación partidaria ao ámbito escolar é alleo á comunidade educativa e só busca deslexitimar un proceso formal e transparente". "A ANPA seguirá traballando para construír unha escola pública inclusiva, crítica e colaborativa. Como fixo sempre", subliñan.
