Ana Pontón e Luis Álvarez critican os Orzamentos para 2024 e a falta de novas competencias para Galicia e presentan a un Rueda nos seus últimos días como presidente
Lanzado xa tras o verán á precampaña das próximas elección galegas, o presidente da Xunta, Alfonso Rueda, vén anunciando nas súas intervencións públicas sucesivas axudas directas a diversos colectivos, especialmente para as persoas de máis idade, como fixo hai dúas semanas no debate de política xeral. Daquela, ademais de bonos para dependentes coidados na casa e para residencias de maiores, avanzou que a Xunta creará un Carné +65 con descontos similares aos do Carné Xove. E este xoves foi un paso máis alá e concretou que permitirá viaxar gratis en todos os autobuses interurbanos competencia da Xunta a partir do 1 de xaneiro.
O anuncio lanzouno Rueda na súa última intervención na sesión de control á Xunta deste mércores no Parlamento de Galicia. Un pleno no que BNG e PSdeG lle pedían explicacións pola súa xestión á fronte do Goberno galego e no que o presidente respondeu criticando supostos privilexios do Goberno de España a Catalunya, ao xeito en que o seu antecesor, Alberto Núñez Feijóo, recorría a Venezuela ou ETA como resposta ás críticas da oposición.
A portavoz nacional do BNG, Ana Pontón, centrou a súa pregunta na ausencia de novas transferencias a Galicia durante os 14 anos de goberno do PP. Pola súa banda, o socialista Luis Álvarez lamentou que os Orzamentos para 2024 que a Xunta vén de remitir ao Parlamento contemplen "medidas puramente electoralistas" pero non unha mellora dos servizos públicos como máis prazas de residencias ou un maior compromiso coas políticas de emprego.
A resposta de Rueda nos dous casos consistiu en referirse ás negociacións de Pedro Sánchez para ser investido presidente do Goberno de España a cambio de supostas concesións a Catalunya aínda non concretadas que ao seu ver prexudicarían a Galicia. Cuestión da que non só fixo responsable ao PSOE senón tamén ao BNG, malia que asegurou que "Sánchez non lles fai caso".
Pontón e Álvarez, pola contra, aseguraron que Rueda está nos seus últimos días como presidente da Xunta. "Boicotean o futuro de Galicia", dixo Pontón ao PP, mentres que o socialista asegurou que o seu partido vai "devolverlle a Galicia a ilusión que vostede lle ten quitado no seu ano e medio de presidencia".