Sesión de alta voltaxe no Congreso. O presidente do Goberno de España, Pedro Sánchez, rexeitou que haxa corrupción xeneralizada no Executivo e no seu partido e desvinculouse por completo dos casos relacionados con José Luis Ábalos, Santos Cerdán e Leire Díez: "Xamais coñecín nin toleraría estas prácticas".

"Non debe haber impunidade para os corruptos, sexan quen sexan", sostén o presidente do Goberno de España no Congreso sobre a condena a Ábalos

Sánchez, durante o seu discurso inicial de máis de media hora, mostrou tamén o seu apoio ao ex-presidente José Luís Rodríguez Zapatero neste momento da investigación xudicial e defendeu de maneira "clara e rotunda" que non houbo un trato de favor para conceder as axudas para o rescate da aeroliña Plus ultra.

Nas súas primeiras palabras tras a condena a José Luís Ábalos e Koldo García polo Caso Mascarillas, o xefe do Executivo subliñou que respecta e acata a sentenza do Tribunal Supremo, "como non pode ser doutra maneira". "Estamos convencidos de que neste país non pode haber espazos de impunidade para as persoas corruptas, sexan quen sexan", indicou. Pero, acto seguido, tamén profundou en que o PSOE "non se financiou irregularmente".

Así mesmo, o líder dos socialistas detívose nos casos da súa muller e do seu irmán. Lembrou que Begoña Gómez traballou na Universidade Complutense desde 2012 e que cobrou "cero euros", mentres que a praza que ocupou David Sánchez na Deputación de Badajoz saíu a concurso cando el xa non era líder do PSOE.

"Só vou pedir á Xustiza que sexa xusta"

Sánchez lanzou: "Eu vou confiar na xustiza do meu país. A pesar de que haxa actuacións que custa moito comprender. Porque sei que a inmensa maioría de xuíces fan un traballo modélico, esencial e obxectivo. E só vou pedir á Xustiza que sexa xusta".

 "Para min, a pregunta non é se debemos continuar. A pregunta é como non imos continuar"

"Señorías do PP e de Vox, non sexan hipócritas. Non veñan de defensores da orde constitucional cando están sistematicamente violentando a separación de poderes. Non falen de cloacas cando vostedes están a ser xulgados por montar toda unha policía patriótica. Non mintan afirmando que este é o Goberno máis corrupto da historia cando vostedes teñen máis de trinta casos abertos con 150 implicados", indicou o presidente, que espertou o aplauso en varias ocasións da súa bancada.

Con esta mensaxe para os que piden eleccións: "Para min, a pregunta non é se debemos continuar. A pregunta é como non imos continuar. Porque se aínda hai restos de corrupción no noso país, é evidente que será un Goberno coma o noso e non un do PP con Vox o que poderá acabar con eles. Porque cando nós detectamos casos non os tapamos, perseguímolos. E porque nós traballamos para a xente, non para as elites".

Sánchez tamén quixo lanzar esta idea desde a tribuna de oradores: "Entendo o enfado da cidadanía. Entendo a súa frustración e a súa decepción. Fágome cargo. Entendo que, despois de pasar trinta minutos ante o televisor vendo este chorreo de casos, teñan a tentación de pensar que todos somos iguais. Pero non é certo".

"Temos que facer moito máis para garantir o acceso á vivenda. Para fortalecer a sanidade pública. Para subir salarios que aínda son demasiado baixos e acabar con inxustizas por resolver. Pero a solución a estes problemas non está á dereita"

Neste sentido, fixo unha defensa do seu partido e da súa acción ante o contexto xudicial actual: "Non somos perfectos. Sabémolo. Nin a nosa xestión está completa. Temos que facer moito máis para garantir o acceso á vivenda. Para fortalecer a sanidade pública. Para subir salarios que aínda son demasiado baixos e acabar con inxustizas por resolver".

"Pero a solución a estes problemas non está á dereita. Está no centro e na esquerda deste hemiciclo. As elites deste país sábeno. Netanyahu e outros líderes e tecnoligarcas estranxeiros tamén o saben. Os deputados do PP e Vox sábeno. Por iso non falan de economía, nin de políticas sociais. Por iso non nos contan cal é o seu proxecto enerxético, nin a súa estratexia de posicionamento internacional. Por iso non paran de verter loiadas, manipulacións e lodo ao debate público", reflexionou o xefe do Executivo nunha das súas intervencións máis difíciles na Cámara Baixa.

Pero, á vez, mandou unha mensaxe de resistencia: "Non somos infalibles. Pero non imos cometer o erro de calar. Nin de rendernos. Nin de esquecer que isto non vai de nós nin deles, senón de millóns de españois cuxo benestar e porvir dependen das decisións que toma o Goberno cada martes. Por iso limpamos o que haxa que limpar. Imos defender a verdade onde estea a ser sepulta baixo mentiras. E imos seguir gobernando para quen máis o necesitan".