Xa antes do accidente de Urda o Semaf tiña convocada unha folga para este xoves polo incumprimento das melloras acordadas tras o sinistro de Adamuz, e agora amplía os paros
O sindicato de maquinistas (Semaf) volverá á folga o martes 10 e o xoves 12 de novembro, sendo o mércores 11 o día da folga xeral convocada pola crise de vivenda. Xa antes do accidente de Urda deste mércores o Semaf tiña convocada unha folga para este xoves por incumprimentos das melloras acordadas tras o sinistro de Adamuz do pasado xaneiro, e agora amplía os paros para reclamar unha maior celeridade na implantación de melloras de seguridade.
Máis alá das causas concretas de cada accidente -a ruptura dun carril no caso de Adamuz e un erro humano no centro de control de Adif no caso de Urda, segundo apunta o ministro-, o Semaf viña alertando da necesidade de mellorar a seguridade de todo o sistema ferroviario.
Tras Adamuz o sindicato chegara a diversos acordos co Ministerio de Transporte, pero o seu secretario xeral, Diego Martín, advertía xa en marzo en entrevista con Praza.gal que o importante era poñelos en práctica canto antes e "que as melloras non queden durmidas por interese político como en Angrois". Pero meses despois o sindicato seguía sen ver suficientes avances e convocou para o xoves desta semana unha nova xornada de folga, que segundo Renfe tivo un seguimento do 26%.
Hai dez días o Semaf lamentaba o "bloqueo administrativo dos acordos asinados en materia de seguridade ferroviaria" tras o accidente de Adamuz: "Todo segue igual de paralizado que no mes de maio"
Agora as novas xornadas de folga están previstas como paros totais o día 10 de novembro e paros parciais ao longo do día 12. "Todo segue igual de paralizado que no mes de maio", aseguraba hai dez días o sindicato, que criticaba que "a Administración e as empresas escúdanse na lentitude burocrática de coordinar a varios organismos" pero que esa "é unha escusa inaceptable cando somos conscientes de que se hai vontade son capaces de aprobar calquera norma legal en cuestión de semanas".
