O novo choque , con 68 falecidos, chega só nove meses despois do que deixou 46 mortes en Andalucía, tras o que se comprometeron melloras que o sindicato de maquinistas considera incumpridas, polo que convocara unha folga para este xoves
Nove meses despois do sinistro de Adamuz, con 46 persoas falecidas, e a un mes das eleccións xerais do 29N, a localidade de Urda, en Toledo, rexistrou este mércores un novo accidente ferroviario de alta velocidade. As 68 persoas falecidas ata o momento, sumadas ás mortas en Andalucía e outro falecemento dun maquinista en Catalunya tamén en xaneiro, fan que este 2026 sexa o ano máis mortal no ferrocarril no que vai de século, mesmo superando o 2013 no que ocorreu o accidente de Angrois, que por si só supuxo 79 mortes.
O novo accidente chega un día antes da folga que xa tiña convocada para este xoves o sindicato de maquinistas (Semaf) pola "paralización" dos acordos que acadaran tras o accidente de Adamuz para mellorar a seguridade ferroviaria.
Máis alá das causas concretas de cada accidente -a ruptura dun carril no caso de Adamuz e un erro humano no centro de control de Adif no caso de Toledo, segundo apunta o ministro-, o Semaf viña alertando da necesidade de mellorar a seguridade de todo o sistema ferroviario. Tras Adamuz o sindicato chegara a diversos acordos co Ministerio de Transporte, pero o seu secretario xeral, Diego Martín, advertía xa en marzo en entrevista con Praza.gal que o importante era poñelos en práctica canto antes e "que as melloras non queden durmidas por interese político como en Angrois". Pero meses despois o sindicato seguía sen ver suficientes avances e convocou para este xoves unha nova xornada de folga.
Hai dez días o Semaf lamentaba o "bloqueo administrativo dos acordos asinados en materia de seguridade ferroviaria" tras o accidente de Adamuz: "Todo segue igual de paralizado que no mes de maio"
Hai dez días o Semaf xustificaba o novo paro polo "bloqueo administrativo dos acordos asinados en materia de seguridade ferroviaria", entre outras cuestións. "Todo segue igual de paralizado que no mes de maio", aseguraba o sindicato, que criticaba que "a Administración e as empresas escúdanse na lentitude burocrática de coordinar a varios organismos" pero que esa "é unha escusa inaceptable cando somos conscientes de que se hai vontade son capaces de aprobar calquera norma legal en cuestión de semanas".
Tras Adamuz o secretario xeral do Semaf dicía percibir "un cambio na xestión da rede, outra cousa é que sexa suficiente, iso dirao o tempo". O tempo, tan só nove meses, di agora que este 2026 xa é o ano máis mortal no sector ferroviario do que vai de século.
Segundo os datos oficiais da Comisión de Investigación de Accidentes Ferroviarios (CIAF) do Ministerio de Transportes, que este verán vén de ser substituída pola nova Autoridade Administrativa Independente para a Investigación Técnica de Accidentes e Incidentes Ferroviarios, Marítimos e de Aviación Civil (AIAT), ata agora o peor ano do século por mortes no ferrocarril fora o 2013 do accidente de Angrois. Só nese sinistro faleceron 79 persoas, segundo estableceu a xustiza por un despiste do maquinista e por fallos de seguridade de Adif que non puideron ser atribuídos a unha persoa concreta. Pero ese 2013 a CIAF rexistrou outras dúas mortes máis, ata un total de 81.
Tras deixar de contabilizarse os suicidios en 2008 e eliminarse numerosos pasos a nivel perigosos as cifras de sinistralidade ferroviaria veñen marcadas polos grandes accidentes, como Angrois, Adamuz ou Urda
Nos anos previos as cifras oficiais de mortes no sector ferroviario reducíranse considerablemente en parte debido a unha mudanza metodolóxica. En 2008 deixaron de contabilizarse como accidentes mortais os reiterados suicidios que adoitan producirse nas liñas ferroviarias.
Ademais, hai dúas décadas eran moi habituais os accidentes en pasos a nivel perigosos, con choques contra vehículos ou atropelos de persoas. Pero neste tempo desenvolveuse un intenso traballo de supresión ou mellora deses pasos a nivel e ese tipo de sinistralidade caeu considerablemente.
