O BNG confirma a distribución das súas áreas do goberno de coalición de Lugo que encabeza a socialista Lara Méndez. Rubén Arroxo dirixirá a áreas de Tenencia de Alcaldía e Mobilidade con Alexandre Penas como edil de Infraestruturas. Maite Ferreiro será concelleira de Cultura, Turismo e Promoción da Lingua, Cristina López de Participación e Servizos á Veciñanza e Felipe Rivas, de Educación. Nestes días os gobernos constituídos o pasado sábado están a ultimar a súa organización.
Prisión incondicional para o home e a muller detidos en Vigo acusados de pertenza a organización terrorista, tenza de explosivos e falsidade, baixo procura policial dende 2006 e mais para outras dúas persoas acusadas como colaboradoras. As forzas de seguridade denominaron o operativo como Operación Lusista contra Resistencia Galega.
Alcoa e o fondo suízo Parter Capital acadan un preacordo de venda das fábricas da Coruña e Avilés. O Goberno central asegura que garante “o mantemento do 100% dos postos de traballo e das capacidades produtivas das dúas plantas”. Consulta aquí toda a información
Malraio, De Vacas, Agoraphobia, Miss Bolivia ou Kumbia Queers, no programa Atardecer no Gaiás que a Cidade da Cultura presentou este martes xunto ao resto da súa programación de verán.
Persoal de Alcoa péchase na Delegación do Goberno central en Galicia, na Coruña, "ata que o Ministerio de Industria cumpra os seus compromisos" como "valedor dos investimentos" nas factorías e dea "garantías para o mantemento do emprego". "Están a desentenderse das súas obrigas", afirman na xornada en que o Ministerio de Industria expón as ofertas de compra aos gobernos de Galicia e Asturias.
O Ministerio de Industria expón hoxe aos gobernos galego e asturiano a oferta do fondo suízo Parter para mercar as factorías de Alcoa na Coruña e Avilés, que o persoal xa coñece. Mentres, os traballadores de Alcoa e o resto de industrias electrointensivas reclaman un marco eléctrico que asegure o seu futuro.
76 membros e ex-membros do Parlamento Europeo, entre eles Ana Miranda (BNG), acusan as autoridades españolas de "vulnerar os dereitos fundamentais" de Junqueras, Puigdemont e Comín por non lles permitir completar a súa acreditación como eurodeputados electos.
Suspendidos cautelarmente de militancia os edís do BNG en Catoira que chegaron ao goberno o pasado sábado co apoio do PP. "Non imos avalar a situación deste concello nin ningún acordo tácito ou explícito co Partido Popular", advertiu en rolda de prensa Ana Pontón.
Boris Johnson, ex-ministro e candidato a liderar os Conservadores británicos, láiase de que a conexión a internet sexa máis rápida en "vilas remotas de Galicia" [Galician pueblos, no texto orixinal] que nalgunhas cidades do Reino Unido. Faino nun artigo publicado en The Telegraph que el mesmo vén de divulgar nas súas redes sociais. Os datos máis recentes non concordan coa súa afirmación.
Dimite Álvaro Santos como secretario provincial do PSdeG en Lugo. O tamén edil no goberno da capital lucense abandona o cargo orgánico en vésperas da elección da representación do partido na Deputación e por extensión, da candidatura á presidencia, sobre a que a dirección provincial discrepa da Executiva Nacional do PSdeG, como o propio Santos vén de admitir en rolda de prensa. Máis información, hoxe en Praza.gal
