A Audiencia da Coruña prohibe a divulgación do vídeo da reconstrución policial do asasinato de Diana Quer. Segundo confirma o TSXG, o presidente do tribunal que xulga a José Enrique Abuín, asasino confeso da moza secuestrada na Pobra, subliña que restrinxe a divulgación do vídeo para preservar a "imparcialidade" do xurado. O espazo de Telecinco El Programa de Ana Rosa anunciara a súa emisión.
A segunda reunión entre PSOE e Unidas Podemos acaba sen acordo. Echenique asegura que os socialistas rexeitan volver sentarse se a súa formación non renuncia a unha coalición e Lastra di que "hoxe por hoxe" non ve "saída". Máis información, esta tarde en Praza.gal.
A presidenta electa da Comisión Europea, Ursula Von Der Leyen, dá a coñecer o reparto de carteiras do seu equipo, con Josep Borrell como un dos vicepresidentes e Alto Representante para a política exterior. Agora as persoas que optan a estes cargos na nova Comisión teñen que ser avaliadas polo Parlamento Europeo. Entre as novidades figura a controvertida inclusión das políticas migratorias nunha área para "protexer o noso estilo de vida europeo".
Unhas novas eleccións xerais situarían o PP como a forza que máis medra e o PSOE tamén gañaría escanos. Case dous millóns de votantes pasarían á abstención e a correlación de forzas entre esquerda e dereita apenas variaría, segundo a enquisa de Celeste-Tel para eldiario.es
A Mesa do Parlamento aproba só cos votos do PP o documento que ratifica o veto a actos reivindicativos nas súas instalacións e os límites a vestimentas contra o "decoro" da institución.
O Banco Central Europeo autoriza a Abanca para culminar a compra do Banco Caixa Geral, a rede española do Grupo Caixa Geral de Depósitos que lle fora adxudicada na poxa organizada polo Goberno portugués. "Esta operación corporativa permitirá sumar 7.000 millóns en volume de negocio e máis de 131.000 clientes", destaca a entidade, que vén de confirmar a autorización nun comunicado.
A Xunta esixe responsabilidades ao Goberno central polo atraso de servizos no CEGADI, o centro de discapacidade compostelán que o Goberno galego mantivo durante máis de cinco anos construído e pechado. A conselleira de Política Social reitera a petición de que o Ministerio de Sanidade asuma, como comprometera, a posta en marcha da área residencial do centro.
O Igadi conmemora o seu vixésimo oitavo aniversario analizando a política exterior dos EUA dende o 11S ata a actual guerra comercial impulsada por Trump. Farao este 10 de setembro ás 19:00 na Facultade de Ciencias Políticas da USC da man de Jared D. Larson, profesor de Relacións Internacionais da Universidade de Humboldt State, California.
Xa se pode ver o vídeo que amosa todo o que sucedeu na última edición do Resurrection Fest. Boas lembranzas de Viveiro!
7 artistas de aquí e de vangarda que vas poder coñecer grazas ao WOS. VINTE elabora unha escolma da presenza galega no WOS, festival que leva seis anos levando a Compostela as propostas máis estimulantes da música contemporánea e de vangarda. A cita deste ano, do 11 ao 15 de setembro.
