O Paseo dos Soños de Vilalba incorpora este sábado un monumento a Alfonso Blanco, sacerdote impulsor da asociación Xermolos, da Irmandade Manuel María ou do Festival de Pardiñas. Únese á ducia de creadores da Terra Cha que xa contaban cun recoñecemento xunto ao río Magdalena.
A esquerda mantería o poder na Coruña e imporíase amplamente á dereita, segundo unha enquisa que publica La Opinión de A Coruña. O inquérito encargado pola Marea Atlántica avanza o descenso do partido de goberno, pero tamén do PP.
Persoal dos medios públicos protesta no #VenresNegro38CRTVG polas "represalias" contra Marga Pazos. "Non pode redactar noticias nin titulares. Tampouco editar imaxes. Só le textos", di Defende A Galega, que denuncia tamén "manipulación, desmantelamento e control político". #TodassomosMarga, reivindica o colectivo.
En que bares se pode parar se hai que ir recorrentemente de Pontevedra a Ourense pola estrada N-541? Este interactivo de Vinte responde a esa pregunta detallando a calidade do petisco que poñen co café, a dispoñibilidade da prensa e a conversa que ofrecen seareiros e taberneiros
Trinta lumes, a película de Diana Toucedo sobre o Courel, chega esta fin de semana aos cines. A cineasta estará esta tarde ás 18.00 horas na sala Numax de Santiago e ás 20.00 horas en Codex Cinema en Lugo.
A secretaria xeral de Igualdade afirma que "a situación actual da lei do aborto é adecuada" e chama a "respectar ás persoas, tomen a decisión que tomen" porque "cada persoa é dona do seu corpo". Susana López Abella retrucou deste xeito ás preguntas da prensa sobre a intención de Pablo Casado de derrogar a lei do aborto se tivese votos dabondo no Congreso para facelo. Recólleo El Progreso
David Rubín pon a imaxe á vixésimo terceira edición dos premios de teatro María Casares. O autor ourensán, con proxección internacional no mundo da banda deseñada, "recupera o rostro de María Casares" e tenta "representar o que significa ser, non só intérprete, senón profesional do teatro". Os galardóns entréganse o 21 de marzo no teatro Rosalía Castro da Coruña.
O TSXG condena a Xunta a indemnizar con 38.800 euros a dous ocupantes dun vehículo que bateu cun xabarín na estrada PO-205 ao seu paso por Silleda en outubro de 2015. O tribunal considera que o Goberno galego debeu instalar sinais sobre o perigo da "frecuente presenza das especies que son obxecto de caza". A indemnización, aclara o TSXG, esténdese tamén á aseguradora dos accidentados.
PSOE e Unidos Podemos alíanse para eliminar o voto rogado antes das eleccións de maio. Rexistran este venres no Congreso unha proposta para modificar a lei electoral, como advertira o Goberno central no verán, e poder aplicala nos próximos comicios autonómicos aos votantes residentes no exterior. A eliminación do actual sistema fará retornar tamén as pantasmas do "voto emigrante".
Feijóo cambia a súa axenda nos Estados Unidos e agora prevé ir á manifestación das dereitas contra Pedro Sánchez: “Se ten forma de estar en Madrid, estará”, confirma o PP a Praza.gal
