Fálase

O Ministerio de Sanidade actualiza a estratexia de vacinación da COVID, incluíndo a vacina de Oxford-AstraZeneca e os novos grupos prioritarios. O documento íntegro pódese consultar aquí. Ata o pasado martes, recibiran as dúas doses da vacina en Galicia un total de 54.604 persoas e o Sergas levaba administradas 114.462 doses, o 76,5% das recibidas, segundo datos do Ministerio. Os da Consellería de Sanidade, pechados horas despois, indicaban que eran xa 114.783. Podes acceder nesta ligazón ao gráfico interactivo sobre a evolución da vacinación en Galicia.

• HEMEROTECA | Protexer a xeración da guerra e da postguerra, próximo reto da vacinación contra a COVID

O Tribunal Superior avala que o Concello de Vigo continúe a construción de ramplas mecánicas na Gran Vía sen permiso de Patrimonio. Os xuíces din que a Xunta non argumentou debidamente por que as ramplas poderían afectar aos edificios catalogados da contorna. Hai dous meses inaugurouse o primeiro treito de ramplas pero seguintes fases foron paralizadas por Patrimonio da Xunta.

Unhas 54.000 persoas recibiron xa as dúas doses da vacina contra a COVID-19 en Galicia, as que fornecen a inmunidade. Segundo os datos divulgados este martes polo Ministerio de Sanidade, o Sergas levaba administradas ata o sábado 114.111 doses, se ben datos máis recentes da Consellería de Sanidade situábanas onte en 114.423. [Preme aquí para veres o gráfico interactivo] Este mércores, o Parlamento Europeo aborda coa presidenta da Comisión, Ursula Von der Leyen, a xestión da UE na contratación e distribución das vacinas.

• HEMEROTECA | A Xunta fixa “a principios de maio” o remate da vacinación fronte á COVID en maiores de 80 anos

Un xulgado condena a multas de 180 euros a cada unha das oito persoas que subiron ao balcón da coruñesa Casa Cornide, dos Franco, reclamando a súa recuperación.

• AMPLIAMOS 👉 Os activistas que ocuparon a Casa Cornide para denunciar o espolio da familia Franco, condenados por un delito de coaccións

A Xunta inclúe Asturias na obriga de control polo coronavirus de viaxeiros que cheguen a Galicia, na que segue Castela e León. Unha nova actualización da anterior listaxe de territorios, do 26 de xaneiro, mantén igualmente a esixencia de comunicar as estancias en Portugal e Francia. 

O ex-conselleiro Antonio Couceiro, novo presidente do Deportivo. Abanca sitúa o tamén ex-presidente do Porto da Coruña á fronte do club tras prescindir da actual directiva.  

Hoxe comeza o primeiro xuízo sobre a 'caixa B' do PP, centrado na reforma da sede central do partido con diñeiro negro. Vén marcado pola nova confesión do antigo tesoureiro da formación, Luis Bárcenas, que tras o encarceramento da súa esposa volveuse amosar disposto a colaborar coa Xustiza mediante as súas revelacións.

• HEMEROTECA | A sentenza de Gürtel describe fraude no PP dende a súa fundación

O Ministerio de Saúde portugués rexeita o ofrecemento lanzado pola Xunta para que o hospital Álvaro Cunqueiro de Vigo acolla doentes de Covid-19 procedentes de Portugal. O Executivo luso agradece a proposta, mais sinala que "a situação da região Norte encontra-se estabilizada e com capacidade de resposta previsível para os próximos dias"

Concentracións en Vigo, A Coruña, Compostela, Ourense e Lugo reclaman a absolución de Pablo Hasel, condenado a unha pena de prisión polas letras das súas cancións e o contido dalgúns tuits. O rapeiro deberá ingresar na cadea nos vindeiros días por delitos de "inxurias contra a Coroa e as institucións do Estado" e "enaltecemento do terrorismo"

O Ministerio de Sanidade advirte de que a presenza da variante do coronavirus descuberta no Reino Unido (B.1.1.7) está "aumentando rapidamente" no Estado Español, o que podería provocar un incremento "da incidencia e posiblemente da taxa de hospitalización e a letalidade nas vindeiras semanas". O informe admite a posibilidade de que a variante non só sexa máis contaxiosa, senón que estea relacionada cunha maior gravidade e letalidade das infeccións. Os datos preliminares sitúan a Galicia como un dos territorios do Estado nos que a variante tería unha maior prevalencia. O SERGAS confirmou 14 casos pertencentes a esta cepa, con outros 200 en estudo, sospeitándose que todo o gromo rexistrado no hospital Meixoeiro de Vigo corresponde a esta mutación