🎄Durante o Día de Aninovo, Praza non se actualiza por descanso do persoal. Pero deixamos moito para ler e o domingo, día 2, estamos de volta. Boas festas!
Fálase
-
O derbi entre o Obradoiro e o Breogán previsto para este luns día 3 de xaneiro queda aprazado ante a aparición de novos positivos por COVID no equipo compostelán.
O secretario xeral do PSdeG, Valentín González Formoso, comparte unha mensaxe de fin de ano na que salienta o traballo “imprescindible” do persoal sanitario e aposta para 2022 por unha defensa dos servizos públicos e “polo benestar dos maiores, pola sanidade e a educación públicas ou polos mozos e mozas deste páis".
O Tribunal Superior autoriza a Xunta a vetar os encontros entre persoas non conviventes dende o peche dos pubs (3 da madrugada) e ata as 6 da mañá tanto na rúa como en espazos privados. O TSXG xustifica o aval polo "relevante risco" de transmisión da COVID e porque, dadas as excepcións e as horas da limitación, é unha medida "eficaz" que supón unha "limitación tenue" do dereito de reunión. Así e todo, a resolución reflicte que o Goberno sustentou a petición cun informe "completamente orfo de identificación dos informes e estudos que se empregan como base das afirmacións nel recollidas" e con "ausencia de motivación na petición das medidas solicitadas". O mesmo auto autoriza a extensión do certificado COVID nos bares a todo o seu horario de apertura.
A Xunta ten previsto aplicar a medida dende as 00:00 deste 31 de decembro e ata as 00:00 do 18 de xaneiro, tal e como ratificou na súa publicación no DOG, que tamén especifica as excepcións.
A portavoz nacional do BNG, Ana Pontón, comparte unha mensaxe de fin de ano na que eloxia o labor do persoal sanitario e científico: "Como non reclamar unha Galiza que poña no centro á ciencia e o coñecemento para construír un futuro mellor", sinala a líder do Bloque, que apela ao "o optimismo dunha Galiza que o ten todo para saír adiante" malia "termos por diante unha situación complexa" a causa da pandemia.
Xa están no DOG os cambios nas restricións da Xunta pola COVID que atinxen a ámbitos como a hostalería ou os espectáculos públicos, alén de incorporar as mudanzas na obrigatoriedade do uso da máscara ao aire libre. Son todas as anunciadas agás a limitación aos encontros entre persoas non conviventes dende a hora de peche dos pubs (3 da madrugada) e ata as 6 da mañá, que require autorización xudicial e que polo momento obtivo o visto e prace da Fiscalía. Na imaxe, o Consello da Xunta deste xoves (CC BY-SA David Cabezón / Xunta)
A Xunta amplía a súa petición ao Tribunal Superior de Xustiza para que o veto aos encontros entre non conviventes tras o peche dos pubs e discotecas (de 3 a 6 da madrugada, segundo o pactado co sector) se aplique tamén a espazos privados e non só á rúa. Inicialmente, anunciara que pediría aval para impedir estes encontros en espazos públicos de 2 a 6. Segundo indica o Goberno galego, a petición ao Tribunal inclúe excepcións como "a pernocta no mesmo domicilio no caso de reunión ou reencontro familiar ou de achegados" ou o coidado a menores ou anciáns, entre outras.
O Xulgado de Instrución número 1 de Lugo resolve dividir en trinta e tres causas a peza principal do caso Pokémon, tal e como pedira a Fiscalía e resolvera a Audiencia Provincial. O instrutor que substituíu á sancionada xuíza Pilar de Lara conclúe que a única "conexión" de todas as pezas é que nelas interveñen empresas do grupo Véndex, pero deben ser abordadas nos lugares onde se produciron os presuntos delitos.
O Ministerio de Sanidade e as comunidades autónomas acordan rebaixar de 10 a 7 os días de corentena para as persoas que dean positivo por COVID-19 e tamén para os contactos estreitos que, por non estaren vacinados con pauta completa ou no resto de excepcións, teñen que illarse. A decisión chega nun contexto de alta incidencia, co consecuente incremento de baixas laborais.
Feijóo confirma a demora do plan estratéxico da Xunta para 2021-2030, que non será público ata febreiro de 2022.
