Antía Yáñez gaña o III Premio Agustín Fernández Paz de Narrativa Infantil e Xuvenil pola Igualdade coa obra Plan de rescate. O certame está impulsado polo Instituto de Estudos Chairegos, o Concello de Vilalba e a Editorial Xerais. (Imaxe: ©Alberto Lora/ Galaxia)
10N | PP e PSdeG empatarían a 10 escanos por Galicia, onde En Común-Unidas Podemos mantería os 2 que ten e o BNG volvería ter representación no Congreso cun escano pola Coruña, segundo a enquisa de Sondaxe que este domingo publica o xornal La Voz de Galicia. O escano que sumarían os populares e o que lograría o Bloque perderíaos Ciudadanos, que volvería desaparecer das circunscricións galegas.
Masiva manifestación en Barcelona en reclamación da liberdade dos dirixentes independentistas condenados polo Supremo a entre 9 e 13 anos de prisión. Segundo a Garda Urbana da capital catalá, a asistencia rolda as 350.000 persoas. Nesta ligazón, os actos centrais da mobilización, ao vivo (Imaxe: ANC)
O novo goberno portugués toma posesión e o primeiro ministro, António Costa, sinala entre as súas principais promesas novas subas do salario mínimo co "objetivo de atingir os 750 euros em 2023". No inicio da anterior lexislatura, subliña, estaba en 505 euros. O novo gabinete socialista terá que presentar agora o seu programa á Assembleia da República.
Gonzalo Caballero anuncia que o alcalde de Vilagarcía, Alberto Varela, é proposta do PSdeG para ser novo presidente da Federación Galega de Municipios e Provincias, cargo que os socialistas poderán manter en virtude dos resultados das eleccións de maio. Ata agora o posto exerceuno o alcalde do Barco, o tamén socialista Alfredo García. A Fegamp renovará os seus órganos directivos a finais de novembro.
O BNG asina unha declaración a prol da autodeterminación con outras formacións soberanistas do Estado e Feijóo cualifícaos de "anti España" e "anti Galicia"
10N | Un novo promedio de enquisas volve situar o PSOE como primeira forza nas xerais, pero estancado e á baixa mentres o PP se asenta nos 100 escanos e a extrema dereita de Vox segue á alza grazas ao devalo de Ciudadanos. O traballo, publicado por La Vanguardia, apunta a que os populares recuperarán a condición de primeira forza en Galicia que perderon o 28A.
'Chile despertó': máis dun millón de persoas maniféstanse en Santiago de Chile contra as políticas do goberno de Sebastián Piñera e na defensa de mudanzas sociais e económicas. Calcúlase que é a maior mobilización popular dende a fin da ditadura de Pinochet. (Imaxe: @modatima_cl)
O Goberno central dedica case 25 millóns a Alcoa San Cibrao das axudas para compensar emisións de CO2. O acordo do Consello de Ministros autorizou aumentar as subvencións por esta contaminación até os 172,23 millóns de euros.
O deputado Antón Sánchez (Común da Esquerda) reclama o cesamento dun cargo da Xunta que cargou contra a exhumación de Franco e viu "revanchismo" nela. Juan Gómez, xefe de servizo de Conservación da Natureza en Ourense, expresouse deste xeito en varias publicacións en Facebook. A conselleira de Medio Ambiente, departamento do que depende, retrucou no Parlamento que se trata dun "funcionario de carreira" e por esa condición accedeu á xefatura, se ben Sánchez matiza que ese é un posto de libre designación. "El saberá o que di", concluíu Ángeles Vázquez.
