VÍDEO | Tanxugueiras regresan cun novo videoclip de aires 'rosalianos'. En VINTE cóntannos todo sobre Perfidia
Fálase
-
Sabela Ramil lanza Despedida, o primeiro single do seu disco. Faino cun fermoso videoclip fotografado por Lucía C. Pan. Todos os detalles, en VINTE
Hai hoxe 75 anos constituíase en Montevideo o Consello de Galiza, concibido por Castelao e outros persoeiros da época como Goberno galego no exilio. Tivera á fronte ao propio Castelao e mais a Elpidio Villaverde, Ramón Suárez Picallo e Alonso Ríos. Na imaxe, o acto de Constitución do Consello, conservada pola Fundación Isla Couto.
O temporal deixa máis de 700 incidencias en múltiplos puntos de Galicia, segundo o 112. As máis frecuentes foron as caídas de árbores e pólas por mor do forte vento, caso da acontecida na avenida Ramón Ferreiro de Lugo -na imaxe, os traballos de retirada-. Hoxe a alerta é laranxa na costa e tamén por neve na montaña lucense, onde volven estar suspendidas as clases.
A Fiscalía do Tribunal de Contas reclama 690.000 euros ao presidente do Porto da Coruña e a un alto cargo da institución por presuntas irregularidades nunha contrata do porto exterior. É unha información que adianta La Opinión de A Coruña. O ente fiscalizador ten en marcha o procedemento para axuizar "irregularidades contables" e sobrecustos de ata o 27% na construción da infraestrutura de Punta Langosteira.
O PP volve propoñer o ex-alcalde de Ourense, Jesús Vázquez, e a ex-líder do partido en Vigo, Elena Muñoz, como senadores por designación do Parlamento de Galicia Ambos ex-conselleiros xa foran designados para estes postos o pasado xuño. O Parlamento ten que volver designar tres prazas na Cámara Alta tras as eleccións xerais. A terceira praza será para o socialista Xoaquín Fernández Leiceaga, por ser agora o PSdeG a segunda forza parlamentaria.
As clases continuarán suspendidas este venres na montaña de Lugo por mor do temporal de neve. Na zona agárdanse espesores superiores aos 20 centímetros. Na imaxe -de arquivo-, unha máquina quitaneves da Deputación de Lugo.
A alerta vermella no mar deixa ondas de ata 11 metros en Estaca de Bares e refachos de vento superiores aos 120 quilómetros por hora en Malpica ou Lira e de máis de 100 km/h na Coruña, segundo Meteogalicia. Entre as principais incidencias atendidas polo 112 destaca un tornado que tirou "varias árbores e cables de alumeado público" en Arteixo e estragos nun pendello en Ordes, así como numerosas incidencias no tráfico.
Máis de 200 persoeiros do mundo académico e cultural internacional asinan un manifesto que reclama unha "rolda de negociacións" para "unha saída política" ao "conflito" en Cataluña. Entre as persoas que o impulsan figuran sinaturas galegas como as de María Xosé Agra, Xosé Manuel Pereiro, Manuel Rivas, Víctor Sampedro ou Suso de Toro. O texto íntegro do manifesto pódese consultar aquí e nesta ligazón é posible asinalo.
Tal día coma hoxe de hai 30 anos faltaba apenas un mes para as eleccións galegas. Manuel Fraga foi entrevistado en catalán nun espazo de humor de TV3 presentado por Jaume Perich, que o cuestionou sobre asuntos tan diversos como a URSS, as drogas, o alcol, as súas experiencias co amor ou a súa opinión a respecto da pornografía. A canle catalá recuperou hoxe o vídeo.