Catro asasinatos por violencia machista en apenas 24 horas en Castellón, Bilbao e Granada suscitan numerosas mostras de repulsa e poñen o foco nas eivas do sistema de protección ás mulleres que padecen estas agresións. En Galicia diversos concellos desenvolven concentracións durante este mércores.
Fálase
Ciudadanos proclama que "o castelán desapareceu en Galicia" e agrega que "ninguén o pode negar". Afirmouno a través do seu deputado Toni Cantó durante a defensa dunha proposición de lei -rexeitada por 176 votos en contra fronte a 168 a prol- coa que o partido pretendía prohibir que coñecer galego, catalán ou euskera sexa preciso para ter un emprego público nos territorios onde se falan estes idiomas. Podes consultar aquí datos reais recentes sobre o uso do galego.
Medra a presión de PP, Ciudadanos e Podemos cara á ministra de Xustiza, Dolores Delgado, polas gravacións dunha conversa no ano 2009 nun encontro no que tamén participa o ex-comisario José Manuel Villarejo, considerado peza clave das cloacas do Estado.
Antón Lopo gaña o XII Premio de Narrativa Breve Repsol coa novela Extraordinario, centrada nas relacións de familia. Será publicada por Galaxia.
Rosa María Mateo, no Congreso: "Ninguén me vai dar ordes; impórtalles moi pouco a televisión pública, só lles importa cando a poden controlar". A administradora única provisional de RTVE retrucou deste xeito ás acusacións que recibiu por parte de grupos parlamentarios como o PP durante a súa comparecencia na Cámara Baixa. Vídeo divulgado pola Cadena SER.
O grupo de goberno de Sada proporá unha moción no pleno instando o Estado a que "exerza inmediatamente a vía xudicial para recuperar o Pazo de Meirás". "Mentres os Franco se moven, o Goberno do Estado segue pasivo", di Sadamaioría tras o intento de venda da parte do inmoble que lle corresponde a un dos netos do ditador.
A Audiencia de Pontevedra inicia este mércores o xuízo contra os 'miguelianos', apoiados durante anos pola Igrexa antes de consideralos seita. A Fiscalía pide para o seu líder, Miguel Rosendo, 66 anos de cárcere por 21 delitos, entre eles contra a liberdade sexual.
O cadro de Castelao A derradeira leición do mestre comezou este martes en Bos Aires o seu traslado á Cidade da Cultura, onde formará parte da exposición Castelao Maxistral que estará aberta do 5 de outubro ao 3 de marzo. Consulta aquí toda a información
Ana Romaní, galardoada co premio Nacional de Periodismo Cultural, que concede o Ministerio. O recoñecemento chega despois de que a Radio Galega suprimise o Diario Cultural co seu formato habitual, tornándoo en microespazos en diversos treitos da programación. O xurado destaca a súa "longa traxectoria" xornalística, o seu constante traballo de promoción da cultura e a súa "visión de feminismo crítico e compromiso social"
ENQUISA | O CIS sitúa o PSOE como líder en intención de voto en eleccións xerais cun 30,5% dos sufraxios, case 10 puntos por riba do PP, ao que ubica próximo ao empate técnico con Ciudadanos en segunda posición. Unidos Podemos e as súas confluencias ocuparían a cuarta posición co 16,1% dos votos. A sondaxe foi realizada entre o 1 e o 11 de setembro. Máis información en eldiario.es