Villar Mir nega ante o xuíz do caso Púnica que a súa empresa participara no amaño do Metro e defende a “transparencia” coa que sempre actuou. Está a contalo eldiario.es. En Galicia hai medio ano o PP impediu investigar os contratos da Xunta con Villar Mir para non “destruír a democracia”.
O PP rexeita retirar da orde do día do pleno do Parlamento a reforma sanitaria, que comeza a debaterse na Cámara. Os conservadores rexeitaron a alteración da orde do día reclamada por En Marea, PSdeG e BNG ao fío do rexeitamento masivo da norma na manifestación do pasado domingo. As forzas da esquerda instaron o Goberno a frear o proxecto e optar polo "diálogo" cos colectivos afectados. "Se lexisla no Paralmento e non a golpe de contar manifestantes", argumentou o PP.
Puigdemont propón cambiar a lei para ser investido no Parlament. JxCat esixe que sexa votado na Cámara aínda que o seu nomeamento sexa log suspendido e acepte a presidencia simbólica desde Bruxelas.
Xornada fría, con nevaradas en moitas zonas de Galicia e acumulación importante de neve na montaña lucense. Na provincia de Ourense as temperaturas chegaron aos -6º.
Isabel Coixet rodará un filme sobre Marcela e Elisa, protagonistas da primeira voda entre mulleres no Estado, en 1901. Antes de chegar ao cinema a historia de Elisa e Marcela xa tornou en obra de teatro da man d'A Panadaría
O pleno da Coruña aproba definitivamente os Orzamentos do Concello para 2018 cos votos a prol da Marea Atlántica e o PSdeG. Cinco das sete principais cidades galegas teñen xa as contas deste ano aprobadas ou a piques de facelo. Mentres, Ferrol mantén prorrogadas as de 2015 e Ourense, as de 2014.
A neve segue a acumularse en varios puntos de Galicia, especialmente nas montañas do leste de Lugo e mais no sur da provincia de Ourense, tal e como recolle o radar de Meteogalicia. Prevese que as precipitacións en forma de neve continúen este martes. Na imaxe captada por Meteogalicia, efectos da nevarada dos Ancares.
O ministro de Fomento reitera que o Goberno de España non vai acceder á transferencia da AP-9 a Galicia, que o Parlamento galego pediu por unanimidade. Íñigo de la Serna asegurou nunha entrevista na Cadena SER que o gabinete de Rajoy se mantén no bloqueo porque "é unha autoestrada da rede estatal e o Estado ten que ter competencias". Mentres, na Radio Galega, o deputado do PP de Ourense e presidente da comisión de Fomento no Congreso atribuíu o "non" á situación política catalá.
ÚLTIMA HORA | A Audiencia Nacional ve indicios para xulgar a Fernández de Sousa e a antiga cúpula de Pescanova por oito delitos societarios. Consulta aquí toda a información
"Espanhóis invadem as flores portuguesas com as suas abelhas", destaca Público na súa portada. Os apicultores lusos denuncian o traslado de 120 mil colmeas dende Salamanca para "pastar" en territorio portugués, subliñando que esta ocupación se realiza sen apenas controis.
