Fálase

O Goberno portugués ratifica que completará a mellora da liña de tren Porto-Valença malia o atraso das obras. Cando se encargaron os traballos anunciouse que estarían rematados neste 2019, e este martes Jornal de Noticias constatou o atraso, o que fixo que Infraestruturas de Portugal emitise un “esclarecimento” asegurando que “todos os investimentos serão concretizados”. A obra portuguesa, que conta con 125 millóns de Bruxelas, debe compaxinarse coa que aínda vén de iniciar Adif no treito Tui-Vigo.

Entidades de xuristas e de defensa dos dereitos humanos que acudiron como observadoras ao xuízo do procés catalán, entre elas a galega Esculca, emiten un crítico informe a respecto do proceso e da súa sentenza, no que consideran que os acusados non tiveron as "garantías" legais que deberan. Ao tempo, Amnistía Internacional ve na condena a Jordi Sànchez e Jordi Cuixart "unha ameaza aos dereitos á liberdade de expresión e reunión pacífica" e reclama a súa excarceración.

O ex-presidente andaluz José Antonio Griñán (PSOE), condenado a seis anos de prisión polo caso dos ERE. A sentenza inhabilita por nove anos ao tamén ex-presidente socialista da Junta Manuel Chaves. eldiario.es está a debullar a sentenza, que condena un total de 19 ex-altos cargos.

Falece o cantautor portugués José Mario Branco aos 77 anos. na súa dilatada traxectoria colaborou con músicos como o Zeca Afonso e tamén autores galegos como Miro Casabella ou Suso Vaamonde.

As futbolistas poñen fin á folga na Primeira División ao chegar a un acordo cos clubs. O acordo inclúe un salario base de 16.000 euros anuais e unha parcialidade do 75%. 

O Parlamento debate este luns as emendas á totalidade dos Orzamentos de 2020 e á súa lei de acompañamento. En ambos casos serán rexeitadas polos votos do PP. As principais cifras das contas públicas para o vindeiro ano, neste espazo de Praza.gal

O BNG mantén hoxe o primeiro contacto formal co PSOE cara á investidura de Pedro Sánchez. Néstor Rego, deputado electo, reúnese este mediodía coa voceira parlamentaria e vicesecretaria xeral socialista, Adriana Lastra. Na imaxe, Rego no Consello Nacional do Bloque, o pasado sábado, durante a intervención de Ana Pontón.

• "Estamos polo desbloqueo e por un goberno de progreso, pero deben comprometerse con Galiza"

As persoas participantes no IV Foro de Agroecoloxía sinalan a "necesidade urxente de cambiar o modelo económico pola emerxencia climática". Na segunda sesión deste encontro, celebrado en Herbón, debateuse como virar a actual tendencia consumista "para transformala en ferramenta de loita contra o quecemento global do planeta".

Burela leva a cabo este domingo a repetición dos comicios municipais nunha mesa electoral na que non se puideron revisar seis votos anulados. Burela Sempre podería acadar un concelleiro ou ben podería manterse o resultado provisional do 26M, que lle outorgaba 6 edís ao PSdeG, 4 ao PP e 3 ao BNG.

Herbón acolleu este sábado o inicio do IV Foro Labrego de Agroecoloxía, organizado pola Asociación Herbamoura e co que colabora o Sindicato Labrego Galego. O Foro, que remata este domingo dedicou a súa primeira xornada a analizar a interrelación entre a agricultura e o cambio climático e as respostas que se están a deseñar e poñer en práctica tanto dende os poderes públicos como dende as propias labregas e labregos.