Fálase

Unidades do Exército de Terra patrullarán en Vigo para "reforzar a vixilancia" e facer "cumprir as normas" do estado de alarma para frear o contaxio do coronavirus. O alcalde vigués, Abel Caballero, especifica que, segundo indica o Ministerio de Defensa, serán efectivos da Brilat, "en coordinación coa Policía", os que se despregarán na cidade. O comité de seguimento confirmou tamén, di Caballero, a existencia de aloxamentos sufragados polo Concello "en pensións e hostais" para "todas persoas sen fogar que non estaban no albergue". Na imaxe, Caballero en videoconferencia con outros dirixentes da FEMP.

Grande-Marlaska anuncia a implantación de controis de fronteiras terrestres para frear o coronavirus. Na liña do acordado por Pedro Sánchez e António Costa, só estará permitida a circulación de mercadorías e por motivos laborais ou "forza maior". Ao tempo, a Comisión Europea propón un peche do conxunto da fronteira exterior da UE.

PSA anuncia o peche das súas fábricas en toda Europa pero en Vigo adíao ata o mércores. O grupo di que “os equipos de xestión de cada centro porán en marcha localmente os protocolos de peche das plantas que se levarán a cabo en coordinación cos axentes sociais. En Vigo os sindicatos xa se mobilizaran ante a negativa inicial da empresa a pechar. Ampliamos a información neste espazo

Urkullu suspende as eleccións vascas e os partidos galegos manteñen unha reunión por videoconferencia para facer o mesmo.

O operativo contra o coronavirus das forzas armadas, Operación Balmis, colle o nome do médico militar que difundiu polo mundo a vacina da varíola cun grupo de nenos galegos ao coidado de Isabel Zendal.

As persoas desempregadas non precisarán renovar a súa demanda de emprego, trámite necesario para cobrar as prestacións, ata o 30 de abril. Os trámites urxentes poderán facerse vía telefónica chamando á correspondente oficina de emprego. É unha das medidas establecidas pola Xunta no DOG extraordinario deste domingo.

Dende as súas casas, estudantes de Medicina da USC gravaron un vídeo de apoio ao persoal do Sergas, destacando que "a poboación galega estamos en moi boas mans" e que "temos un gran sistema sanitario, público e universal". "Sodes as nosas heroínas e heroes", conclúen

O Ministerio de Sanidade pon "ás ordes" do Sergas "todas as instalacións da sanidade privada" para facer fronte ao coronavirus. É unha das medidas que vén de anunciar o titular do Ministerio, Salvador Illa, que dá esta indicación a todas as consellerías de Sanidade de todas as autonomías. Ampliamos a información neste espazo

Pechada a fronteira con Portugal para viaxes de turismo e lecer polo coronavirus. Os gobernos de Pedro Sánchez e António Costa acordan manter o tránsito de mercadorías e por motivos laborais.

• As cámaras municipais portuguesas pechan polo virus múltiples servizos que tamén usa veciñanza galega

O rei Felipe VI anuncia que renuncia á herdanza do seu pai, Juan Carlos de Borbón, e retíralle a súa asignación de fondos públicos. A Casa Real anunciou esta decisión tras publicar o xornal The Telegraph que o actual Xefe do Estado é beneficiario dunha fundación que recibiu unha presunta 'doazón' de 100 milóns de euros de Arabia Saudita ao pai. No mesmo comunicado, a Casa Real asegura que o actual rei "descoñece" eses feitos. (Imaxe: Casa Real). Ampliamos a información neste espazo